Telangana mein coronavirus ke badhte mamlaat ki wajah se jahan awam pareshan hain wahein hakkaam bhi sakht iqdamaat ki simt apni sar garmion ko taiz kar chukay hain aur governor Dr.Tamilisai Soundararajanne wazeer sehat Etela Rrajenderse phone par rabt qaim karte hue Telangana mein coronavirus mamlaat mein izafah ki surat e haal par tafseelaat haasil ki hai. Governor ne Telangana mein coronavirus ke mamlaat mein izafah par tashweesh ka izhaar karte hue wazeer sehat se taaza mamlaat ki surat e haal aur waba par qaboo panay ke liye hukoomat ki janib se kiye jarahay iqdamaat aur hospitals mein ilaaj ki sahulaton ke baray mein maloomat haasil ki hain.
ALSO READ:-Hyderabad mein darja hararat 45 degree honay ka imkaan
Wazeer sehat ne governor ko hukoomat ki janib se muaina karne ki sahuliyaat mein izafah, mareezon aur un se rabt mein ane walay afraad ko bakhabar rakhnay ke liye naye app muta-arif karne aur Coronavirus Hosptials mein ilaaj ki sahulaton mein behtari ki tafseelaat fraham ki hain. Governor ne kaha ke Coronavirus ke jald pata chalanay aur fori ilaaj ke aaghaz ke zareya mareezon ki zindagi bachaai ja sakti hai. Iske alawa governor ne awam se appeal ki ke woh ahteyati tadabeer par sakhti se amal karen khaas tor par mask ke istemaal aur samaji doori ko apne uper lazim karlen. Unhon ne awam ke hajhoom ki shakal mein jama honay ko na munasib qaraar diya. Governor ne kaha ke waqfa waqfe se haath dhoney aur sanitizer ke istemaal se coronavirus se bacha ja sakta hai. Governor zayed zimma darion ke tehat Pondicherry mein qiyam Pazeer hain. Unhon ne khusoosi app ke muta-arif karne par mehakma sehat ke ohdedaron ki sataish ki. unhon ne kaha ke mutasirah afraad aur un se rabt mein anay walon ko qareebi testing marakaz pohanchanay mein yeh app madad gaar saabit hoga. unhon ne mausam garma ke paish e nazar teeka andazi mein taizi peda karne ka mahswara diya. governor Soundararajan ne awam se appeal ki ke woh garma ki shiddat ko dekhte hue ahthyat karen taakay sun stroke aur deegar amraaz se bacha jasakay.