Amravati: Police ne zaeef qabaili khatoon ko apne Tractor ke zareya roond kar halaak karne walay ek mulzim ko giraftar karliya. Ye dil dehlana wala waqea AP ke zila Guntur Sivapuram Tanda mein pesh aaya. Police ne mangal ko is mulzim ko giraftar karliya. Maqtolah ke rishta daaron aur arakin khandan ne Narasarao pet ke sarkari hospital ke qareeb mangal ki subah ehtijaj kiya aur mulzim ki giraftari ka mutalba kiya jus par fori tour par karwai karte hue police ne mulzim Sinivas Reddy ki giraftari ka elaan kiya. Tafseelaat ke mutabiq qabaili juda Ramawath Mantru Nayak aur Mantru Bai Sivapuram elaqe main apne khet main kam karte te.
Is joday ne kaasht aur deegar zaroriyat ke liye apne khait ko dehan rakhtay hue 3.80 lakh rupiye ki raqam batoor-e-qarz mulzim Srinivas ke paas se haasil ki. Mulzim is raqam ki wapsi ke liye israar kar raha tha. Is ne qabal azeen karzz ki raqam ki adam adaigi par is khait par qabzah kar lenay ki bhi dhamki di thi. Isi douran mulzim Srinivas kal us waqt khait pouncha jab usay pata chala ke ye joda khait mein ja raha hai. Is ne dono se jhagda kiya aur qabaili khatoon ko apne Tractor se roond dala jis ke nateeja mein mauqa par hi is ki mout hogayi. Is manzar ko dekh kar wo wahan se faraar hogaya. Police ne aaj mulzim ko giraftar kar liya. Is ko adalat mein pesh kiya jaye ga.