Amaravati : Sabiq wazeer-e-aala Andhra Pradesh Anjhani YS Rajasekhara reddy ki 10th barsi ke mauqa par, peer ke roz party ke rehnumao aur unke kumba ke afraad ney inhen kharaaj paish kiya.
Wazeer-e-aala wo YSR congress party ( YSRCP) ke saddar Y S Jagan mohan Reddy ney Kadapa zila ke Idupulapaya may apne waalid ki qabar par phool paish kar ke kharaaj wo aqeedat paish kiya. unki walida Y. S. Vijayalakshmi, aur unki behni Y. S. Sharmila aur kunba ke deegar afraad bhi shareek they.
YSR 2009 ko zila Kurnool mein 4 deegar afraad ke hamrah helicopter ke haadsa mein halaak hue they. haliya intikhabaat mein jagan mohan Reddy ki zair-e-qayadat YSRCP ke Iqtidaar mein anay ke baad Y S rajasekhara Reddy ki yeh pehli barsi manayi gayi.
Is mauqa par Jagan Reddy ney tweet kiya ke ”unke waalid ney apne intizamia aur logon ki Falah wo behbood ke liye schemes ke zareya qoum ko naya rasta dekhaya. agarchay unke waalid jismani tor par mojood nahi hain, lekin woh hamesha apni schemes ki wajah se zindah rahenge. aur hamari rahnumai karte rahenge.
Reyasti wazraa, arkaan-e-parliament, arkaan-e-assembly aur YSRCP rehnumao ney mukhtalif programon ka ineqad karkay YSR ko kharaaj paish kiya. aur unki khidmaat ko yaad kiya. sath hi party rehnumao ney unki 10th barsi ke mauqa par mukhtalif hospitals mein ghareebon ke liye food camps, khoon ka atiyah camp ka ineqad kiya aur mareezon mein phal taqseem kiye. –YTN STAFF