Saudi Arab ke farmaa rava Shah Salman bin Abdulaziz ne Yemen ki qaumi fouj aur sodani fouj ke sho-hada ke khandano ke 1500 afraad ki Hajj ke douran mein sarkari maizbini ka hukum diya hai. Yemen aur soudan ke yeh fouji jung zada parosi malik mein Houthi Shiah baghion ke khilaaf Saudi Arab ki qayadat mein Arab ittehaad ke operation faisla kin tofaan aur operation umeed ki bahaali mein lartay hue shaheed hue hain. un sho-hada ke khandano ki Shah Salman ke maheman nawazi ke programme baraye Hajj aur omra ke tehat maizbini ki jaye gi. Saudi Arab ki wizarat baraye ‘Islami Umoor aur Dawah wo Irshad’ is programme ki nigran hai. Saudi wazeer baraye Islami Umoor aur Dawah wo Irshad Sheikh Abdullatif bin Abdulaziz ne aik bayan mein kaha hai ke ”is programme aur Shah Salman ke hukum se Yemen mein hamaray bhaiyon ki sarzamen aur awam ke difaa ke liye un sho-hada ki dilerana qurbinion ki tehseen zahir hoti hai. Allah taala un sho-hada ki mughfirat farmaen”. Un ka kehna tha ke Saudi Arab ke dosray sarkari mehakmon ke sath rawabit se un sho-hada ke khandano ko saholaten baham pohanchanay ke liye tamam zaroori iqdamaat kiye jayen ge taakay woh baasani Hajj ada kar saken.