Hyderabad: Zindagi ke mukhtalif shobe jaat mein ikhteraayi aur naye naye design market ki maang hai isi ke paish-e-nazar world university of design nay Under Graduates courses shobay design mein muta-arif kiye hain, jin mein 12th jamaat mein kamyaab talba dakhlay ke ahal hunge. world university of design nay shoba design mein jo under graduate course muta-arif kiye hain un mein transportation design, animation and game design, film aur video design aur design management qabil-e-zikar hain. is ke alawa university ki janib se 24 se zayed aisay programme bhi muta-arif kiye gaye hain jo ke design industry mein talba ko ek behtareen aur tabnaak mustaqbil faraham karne ke liye kaleedi rule ada kar sakte hain .
Aaj khaas karkay game film art education, fashion aarts, animation and games, digital designing qabil-e-zikar hain un mein mukhtalif courses faraham kiye gaye hain. is mauqa par izhaar-e-khayaal karte hue world university of design ke Vice chancellor Dr Sanjay Gupta nay kaha ke har taalib-e-ilm ek dosray se mukhtalif hota hai aur har taalib-e-ilm mein ikhtrayi salahiyat ek dosray se mukhtalif hoti hai lehaza har taalib-e-ilm ki munfarid aur mukhtalif salahiyaton ke aitbaar se usay mutadid courses mein dakhlay ki tamam tar sahuliyaat university nay faraham ki hai. 12 th jamaat ke kamyaab talba apni salahiyaton, dilchaspi aur rujhanaat ke paish e nazar design ki duniya mein apni salahiyaton ka muzahira bazabta taleemi Asnad ke zariye kar sakte hain .
Unhon nay sirf ek shobay ka hawala dete hue kaha ke agar yahan transportation design ki baat karen to is shobay mein automobile, Motorcycle, aircraft, rocket aur badi gadiyon ke design ki duniya taalib-e-ilmoon ka intzaar kar rahi hai. isi tarhan fashion art ka tazkara karen to duniya bhar mein kayi aisi companian mojood hain jo malbosaat ke alawa, real state aur deegar shobay mein apne munfarid design faraham karti hain, un ki duniya kaafi badi hai aur zindagi ke mukhtalif shoba jaat mein naye design ki qader o qeemat aasman se baaten kar rahi hain. world university of design ke 8 mukhtalif shobo mein dakhlay aur deegar tafseelaat ke liye university ki Website http : / / worlduniversityofdesign. ac. in / index. php mulahiza ki ja sakti hai . –YTN STAFF