Hyderabad : ICC Worldcup 2019 ka ikhtetaam hochuka hai jis ke baad mukhtalif mahireen cricket aur is se munsalik deegar umoor ka tajzia karne mein masroof hain. isi douran Uber eats jo kay aalmi satah par 500 se zayed shehroun mein apni khidmaat anjaam deti hai, isne 30 May taa 11 July World cup ke muqablon ke douran Hindustan ke mukhtalif shehron mein online order kiye jane walay khaano ka tajzia paish kiya hai jis mein hyderabad mein World cup ke muqabloun ke douran sab se ziyada maang Biryani ki rahi.
Hyderabadi Biryani waisay to saari duniya mein mashhoor hai to phir Hindustan ke maqbool tareen khel cricket aur woh bhi World cup ke muqablon ke douran Hyderabadi awam apni pasandeeda dish Biryani se kis tarhan door reh sakte they. Worldcup ke douran Hindustan ka jab Pakistan se muqaabla tha to is douran bhi hyderabad mein Biryani ke online order ki maang mein kaafi ziyada izafah raha. alawa azeen icecream ke order mein bhi hyderabad ne pehla maqam haasil kiya jabkay Dosa dusray maqam par raha isi tarhan roti ko Hyderabadiyoun ne teesra maqam diya hai.
Company ki janib se Hindustan ke deegar shehron se bhi World cup ke douran honay walay khaano ke online orders ki tafseelaat bhi jari ki gayi hain jis mein Dehli , Jaipur, Indore, Calcutta , pune aur Lucknow mein sab se ziyada roti ko tarjeeh di gayi jabkay banglore ki awam ne sab se ziyada Dosa mangwaya. Ahmedabad ke cricket shaiqeen ne pizza ko tarjeeh di jabkay Mumbai ki awam icecream ki dildada rahi.
Nagpur walon ne samosa ko tarjeeh di to Amritsar ne Burger ko pehla maqam diya isi tarhan chandigarh walon ne paratha mangwaya. alawa azeen hindustani team jab bhi muqaabla mein kamyabi haasil ki to online meethoun ki maang mein izafah raha jis mein khaas kar cakes, ice-cream aur Gulab jamun awam ki pehli pasand rahi. –YTN STAFF