Manchester: Rawan world cup ke sansani khaiz Semi final mein New Zealand nay asaab shikan lamhaat mein aur khaas kar Ravindra Jadeja ki barq-e raftaar batting ke douran shandaar bowling ka muzahira karte hue Hinudstan ko 18 runs se shikast day kar hindustaniyoun ka khawab bikharte hue musalsal doosri martaba world cup ke final may rasai haasil karli hai.
Manchester ke old traford mein khele gaye pehlay Semi final ko guzashta roz barish ki wajah se rok diya gaya tha jis ke baad New Zealand ki team ney dusray roz apni na-mukammal inning dobarah shuru ki. Hinudstan ki mazboot team ko ek mushkil wicket par jeet ke liye 240 runs ka hadaf mila tha aur qaumi team ka top order New Zealand ki shaandaar bowling ke samnay guzashta matchoun ki tarhan ghair mamooli karkardagi ka tasalsul dikhaane mein nakaam hue. Rohit sharmaa, virat kohli aur KL Rahul fee kas sirf ek run bana kar pavilion lautay to is waqt team ka majmoi score sirf 5 runs tha jiske baad dinesh kartik sirf 6 runs bana kar 24 ke majmoi score par pavilion lout gaye.
Hinudstan ki janib se 5th wicket mein hardik Pandya aur Rishabh pant nay 47 runs ki shiraakat banai aur score ko 71 runs tak pohanchaya taham is mauqa per pant runs bana kar out hue. sabiq captain dhoni jab batting ke liye aaye to team ko shadeed dabao ka saamna tha lekin unhoun nay zimma daari nibhate hue Pandy ke sath 21 runs ki shiraakat bana kar team ko mushkil se nikaalte ki bharpoor koshish ki taham is douran Pandya ek uncha short khailnay ki koshish mein 32 runs bana kar out hue to Hinudstan ka score 6 wicketon par 92 runs tha aur team par karari shikast ke baadal mandala rahay they.
Dhoni nay Pandya ke baad Jadeja ke sath 116 runs ki shandaar shiraakat banakar Hinudstan ke final tak rasai ke imkanaat bhi roshan kardiye jabkay Jadeja nay shandaar batting karte hue apni nisf century banai aur team ko kamyabi ke qareeb bhi ladiya tha. Jadeja nay 59 gaindon par 4 chowkun aur 4 chakkon ki madad se 77 runs bana kar out hue aur jab Jadeja out hue to Hinudstan ko kamyabi ke liye mazeed 32 runs darkaar they aur wicket par behtareen fashioner dhoni mojood they to shaiqeen ki umeeden baqi theen.
Dhoni Hinudstan ko kamyabi ke qareeb laa kar 87 ke majmoi score par dosra run lainay ki koshish mein martin Guptill ki shandaar fielding aur raast throw ka nishana banay lekin is douran unhoun nay apni nisf century mukammal karli thi. Hinudstan ko 49th over mein do nuqsaan bardasht karne pade jab dhoni 50 runs bana kar out hue jis ke baad ferugson nay Bhuvneshwar ki wickten bhi uda dee jis ke baad Hinudstan ki final mein pounchanay ki umeeden dam todh di gayen.
Hindustani poori team aakhri over mein 221 runs bana kar out hui aur sansani kheiz muqablay ke baad Semi final mein 18 runs se shikast ka saamna karna pada. Matt henry ko match mein sab se ziyada 3 wickten haasil karne par behtareen khiladi ka award diya gaya kyunkay unhon nay. muqablay ke aaghaz par hindustani top order ko tabah karne mein kaleedi rule ada kiya tha. qabal azeen guzashta roz ki tarhan Semi final ke dosray din mein bhi hindustani bowlers nay New Zealand ko runs bananay nahi diye aur poori team muqarrar 50 overs may 8 wicketon ke nuqsaan par 239 runs bana saki.
Yaad rahay ke New Zealand nay 2015 ke world cup mein gharelu maidan mein junoobi Africa ko sansani khaiz muqablay ke baad shikast day kar Australia ke khilaaf final khelnay ka aizaz haasil kiya tha taham final mein ek Tarfah muqablay ke baad usay shikast ka saamna karna pada tha. doosri janib hindustani team bhi world cup 2015 ke Semi final tak pounchanay mein kamyaab hui thi taham Semi final mein Australia ke khilaaf 95 runs ke wazeh farq se shikast hui thi. -YTN STAFF