Christchurch: Newzealand ne Pakistan ke khilaaf aalmi number ek batsman kane williamson (238) ki double century aur Henry Nicolas (157) ki century inning aur lower order mein Dirl machal 102 nat out runs ki badolat Pakistan ke khilaaf dosray cricket test ke teesray din 6 wicketon par 659 runs banakar inning declare kardiya aur 362 runs ki badi bartari haasil karli.
Pakistan ki team din ke khail ke ekhtataam tak doosri inning mein ek wicket per 8 runs banachuki hai aur is waqt woh 354 runs se peechay hai. Abid Ali saat aur Mohammad abbas ek run bana kar crease par mojood hain lekin usay inning shikast ka khatrah hai. Is se qabal teesray din newzealand ki janib se williamson ne 112 aur Nicholas 89 runs se agay khelna shuru kya. dono ballay bazoo ne Pakistan ke bowlers ko khoob pareshan kya aur chouthay wicket ke liye record 359 runs ki record sajhedari ki.
Williamson aur Nichols ne newzealand ke liye test cricket ki teesri sab se badi shiraakat daari ki jabkay Pakistan ke khilaaf sab se ziyada shiraakat daari qaim ki. Newzealand ki janib se martin aur andrew jones ne Srilanka ke khilaaf 1991 mein wellington mein teesri wicket ke liye 467 runs ki shiraakat daari ki. Is ke baad 1972 mein west indies ke khilaaf pehli wicket ke liye terry jarus aur glane turner ke darmiyan 387 runski shiraakat daari hui. yeh newzealand ki test tareekh mein doosri badi shiraakat daari hai.
Is se qabal Williamson ne 2015 mein Srilanka ke khilaaf watling ke sath chhati wicket ke liye 365 runs ki nat out shiraakat daari qaim ki thi jo test cricket mein newzealand ki chothi sab se badi shiraakat daari hai. Is match mein Williamson aur Nicolas ne Pakistan ke khilaaf test cricket mein sab se badi shiraakat daari ki. Is se qabal newzealand ne Pakistan ke khilaaf test mein 300 runs ki ek bhi shiraakat daari nahi ki thi. Mculum aur Williamson ne 2014 mein Sharjah mein doosri wicket ke liye 297 runs ki shiraakat daari ki thi.
Newzealand ke captain williamson series mein mustaqil tor par umdah karkardagi ka muzahira kar rahay hain. Williamson ne is season mein khailay gaye tamam test matchon mein centuria banai hain. unhon ne rawan season mein 251,129 aur 238 runs banaye hain. unhon ne apne career mein chothi double century Pakistan ke khilaaf is match mein double century ki madad se banai hai.