Hyderabad: Raabton ke liye sab se maqbool aam zariya Whatsapp ke zariye aaj taqreeban har kaam anjaam diya jaraha aur khas kar corona bohran ke dauran toh Whatsapp kisi nemat se kam sabit nahi huwa hai neez khangi aur hukoomati idaron ne bhi is app ka kafi istemal kiya hain aur ab corona ke khilaf teeka andazi ke liye bhi Whatsapp ko istemal kiya jaane laga hai. Markazi hukoomat ne Hindustan mein teeka andazi muhim mein shiddat paida karne ka faisla karte huwe Whatsapp ke zariye bhi corona teeka ki booking karwane ki sahulat farahum ki hain.
Hindustan ke beshtar shehriyon ke pass smart phones maujood hain jis mein Whatsapp ka istemal aam baat hai. Markazi hukoomat ne ab awaam ko Whatsapp ke zariye teeka ke liye slot book karne ki sahulat farahum ki hain. Markazi vazeer sehat ne ek tweet karte huwe yeh ittela di hain. Is sahulat ka bharpur faida utathe huwe awaam ab chand second mein apne liye corona teeka ka slot book kar sakte hain. Apne waqt aur muqaam ka tayun karne ke liye awaam pehle corona help disc number 9013151515 ko apne rabton ki fehrist mein mehfooz karle. Uske baad Whatsapp mein is number par slot book karne ke liye paighaam rawana karein.
Fauri aap ke phone number ko 6 adad par mushtamil OTP aaeiga woh OTP enter karte huwe number ki tasdeeq Karli jaeigi. Uske baad tareeq muqaam pin code teeke ki khisam ke alawa dusri tafseelat darj karein. Khana Puri ki takmeel ke baad tasdeeq karne ki surat mein aap ka slot book ho jaeiga..iske alawa markazi hukoomat ne aap ko vaccine certificate hasil karne ki bhi Whatsapp mein sahulat farahum ki hain..uske liye aap ko Whatsapp par download certificate message karna hoga uske baad agar OTP aur naam ki tasdeeq hogayi toh aap ke teeke ki sanad download ho jaeigi.