Hyderabad : Whatsapp ke baghair aaj hum apni zindagi ka tasawwur bhi mahaal samjhte hain lekin yeh khabar padhnay ke baad aap ko tashweesh la-haq hojayegi Whatsapp par rawana kardah aap ke paegham nah sirf raddo-badal kiya jaskate hai balkay paegham rawana karne walay ki shanakht hi tabdeel kar di ja sakti hai.
Whatsapp sarfeen ke liye haeran kan khabar aayi hai jiske mutabiq aap kisi ke bhi paegham mein apni marzi se tabdeeli kar sakte hain. ek saal se jari is khaami ko ta haal-e-door nahi kiya jasaka. isi tarah do mazeed khamiyan samnay aayi hain. ek khaami ko hukkaam ne theek kar diya hai taham teesri khaami door karne ka kaam jari hai. tafseelaat ke mutabiq duniya ki sab se badi social media ki Website Facebook ek saal guzarnay ke bawajood Whatsapp mein samnay anay wali khaami ko door nah kar saki. badi khaami yeh hai jis mein aap kisi ke bhi paegham mein mann chahi tabdeeli kar sakte hain.
Mahireen ke mutabiq naye tool se Whatsapp par aap kisi ki zabaan se bhi apne alfaaz ada karwaye jasakte hain. cyber security par kaam karnay wali firm checkpoint ne tool ke zariye amli muzahira kar ke dekhaya hai ke kaisay kisi ke bhi paegham mein mann chahi tabdeeli ki ja sakti hai jisay pakda bhi nahi ja sakta. firm ke muhaqiq ne kaha hai ke tool ki madad se koi bhi bad niyat Sarif jaali khabar bana sakta hai aur kisi ko bhi dhoka desakta hai. tool ke zariye kisi shakhs ke paegham ke alfaaz is tarah tabdeel kiye jasakte hain ke jaisay isi ne hi likhay hon halaanke haqeeqat mein iske paegham mein woh baten shaamil hi nah theen.
Mazkoorah tool ne paegham mein tabdeeli ke sath sath Whatsapp ki security ki ek aur khaami ko be-niqaab kiya hai jiske zariye bhejnay walay shakhs ki shanakht ko bhi tabdeel kiya jasakta hai yani aap kisi 1 shakhs ka paegham dosray se mansoob kar sakte hain. mohaqiqeen ne Whatsapp mein teesri khaami ki bhi nishandahi ki taham usay Facebook ne durust kardiya jabkay paegham aur shanakht mein tabdeeli jaisi khamion ko durust karne mein nakami ka aiteraaf kiya hai.
Unhoun ne kaha hai ke Facebook ne inhen bataya hai ke deegar khamiyan Whatsapp mein moujood had-bandiyon ke baais door nahi ki ja sakteen. iski bunyadi wajah Whatsapp mein istemaal ki gayi encryption technology hai jis ki wajah se Facebook ke liye yeh sarfeen ki janib se bheje gaye kisi bhi pegham ko monitor karna aur is ke mustand honay ki tasdeeq karna intehai mushkil hai. –YTN STAFF