Mumbai: Hindustani Cricket Team ke sabiq Opener Wasim Jaffer ne tamam tarz ki Cricket se subuk doshi ka elaan kardiya hai aur is terhan do dahoun par muheet un ke shandaar Career ka ekhtataam hogaya hai.
42 sala Jaffer 31 Test muqabloun mein Hindustan ki numaindagi karte huve 1944 runs score kiye aur runs bananay ki un ki osat 34.11 rahi. Jaffer ne apne is test career ke douran 5 century aur 11 nisf century score ki jabkay 212 un ka azemtareen score raha.
Subuk doshi ka elaan karte huve Jaffer ne kaha ke sab se pehlay mein Allah taala ka shukar ada karta hon jis ne mujhe is khobsorat khail mein apni salahiyaten zahir karne ka mauqa faraham kiya jis ke baad mein apne afraad khandan, Bhaiyoun ka bhi shukriya ada karta hon jinhoun ne mujhe is khail mein hosla afzai ki.
Jaffer ne apne tamam Couches se bhi izhaar tashakkur kiya. Wazeh rahay ke Jaffer ne 2006 mai janoobi Africa ke khilaaf test aur One Day career ka aaghaz kiya tha jabkay Ranji Trophy mein wo 12000 runs score karne walay pehlay hindustani khiladi hain. Jaffer ne 1996-97 ke season mein apne first classe career ka aaghaz kiya tha neez career ke douran inhoun ne 260 muqabloun mein 19,410 runs score kiye. –YTN STAFF