Kolkata: Sunrisers Hyderabad IPL ke 12th Edition mein kul do martaba ki champion Kolkatta Knight Riders ke khilaaf usi ke maidan Eden Gardens mein iftitahi muqaabla khelegi. Hyderabadi team jis ne guzishta season khitabi muqaabla mein shikast khayi thi, is martaba bhi woh behtar muzahira ke zareya tournament ka kamyaab aaghaz karne ke liye koshan hogi .
Hyderabadi shaiqeen ki tamam tar tavajje jarehana opener David Warner par hogi kyun kay woh taqreeban ek saal ki pabandi ke baad team mein wapsi kar rahay hain. Warner ki qiyadat mein Sunrisers Hyderabad ne 2016 may khitaab haasil kiya tha, jabkay 2017 may woh tournament mein sab se ziyada runs bananay walay khiladi they lekin 2018 may Ball tempering tanaza ke baad un par aaed ek sala pabandi ki wajah se woh IPL mein bhi shirkat nahi karpaye they .
Junubi Africa ke khilaaf test muqaabla mein ball tampering ki wajah se Warner is waqt apni team ke captain stevin smith aur opener Bendcroff ke hamrah pabandi ka shikaar hue they. Bendcroff ko 9 mah ki lekin warner aur smith ko ek saal ki pabandi bardasht karni padi hai aur yeh pabandi 28 March ko khatam horahee hai taham bain ul aqwami cricket par pabandi ke bawajood yeh khiladi domestic leagues mein shirkat ke ahal qarar diye gay jis ki wajah se warner aur IPL mein shirkat kar rahay hain .
Bangladesh permier league mein Warner kohni ke zakham mein mubtala hue they lekin sahet yab honay ke baad unhoun ne sydney club ki team ke muqablay mein 77 gaindon mein century banakar –apne form ka ishara diya hai. Kane Williamson team ki qiyadat karenge jabkay bowling shoba mein Bhuvneshwar kumar ke sath Afghanistan ke Rashid Khan aur all rounder Vijay Shankar bhi team ke ahem khiladi honge .