Hyderabad: Greater hyderabad municipal coroporation ( GHMC ) ke intikhabaat se qabal Hyderabad ki siyasat mein kayi ek badi aur ghair mutawaqqa tabdeelion honay ki paish-e-qiyasiyan urooj par hain jaisa ke Vijayashanti aglay haftay BJP mein shaamil honge agar zaraye ki baat maani jaye to party ke qaumi sarbarah JP Nadda ki moujoodgi mein TPCC campaigns committee ki chairperson Vijayashanti ke 20 ya 21 November ko BJP mein shaamil honay ka imkaan hai.
Zaraye ke mutabiq Vijayashanti aaindah GHMC intikhabaat ke liye BJP ke liye intikhabi muhim chalayeinge. sabiq adakar assembly intikhabaat ke baad se hi congress party ki sar garmion mein hissa nahi le rahay hain aur apni rahaish gaah se bayanaat dainay tak khud ko mehdood kar chuki hain.
Dar-haqeeqat unhon ne wabai marz se bohat pehlay hi media ko TPCC ko apne bayanaat bhejna band kardiya tha lekin woh social media par nisbatan mutharrak rahi hain. Ek haliya social media post mein Vijayashanti ne apne ohda TPCC campaigns committee ki chairperson ka zikar nahi kiya, is se kuch had tak wazeh ishara milta hai ke woh congress chodney wali hain. congress ke rehnumao ne inhen is baat par raazi kiya tha ke woh azeem party ke sath juda nah hon lekin saari koshish raigan hain.
Is ke alawa GHMC intikhabaat se qabal badi aur qadeem party ko ek zabardast dhaka lagnay wala hai kyunkay, hyderabad ke sabiq mayor Karthika Reddy congress se subukdosh honay par tayyar hain. zaraye ke mutabiq, TPCC ke general secretary Karthika Reddy aur unke shohar aur TPCC secretary Banda Chandar reddy BJP ke reyasti chief bandi sanjay kumar, markazi wazeer mumlikat baraay dakhla G. kishan reddy aur deegar senior qaideen ki mojoodgi mein BJP mein shaamil honge.
Zaraye ne kaha hai ke RSS ke reyasti rehnumao ne Karthika Reddy se rabita kiya aur 6 mah qabal is jode ke sath baat cheet ki. maloom hua hai ke kishan ready 6 mah qabal Karthika Reddy ki rahaish gaah bhi gaye thay aur is jode ko BJP mein shamoliat ki dawat di thi.
Mobayyana tor par is jode ne yeh yaqeen dehani karwanay ke baad kishan reddy ki dawat qubool karli thi ke party 2023 ke intikhabaat mein secunderabad assembly ticket fraham karegi.
Yaad rahay ke Karthika Reddy ko congress party se secunderabad ke MLA ke ticket ki tawaqqa thi. Karthika Reddy ne 2009 se 2012 tak hyderabad ke mayor ki hesiyat se faraiz injaam diye thay. 2023 ke assembly intikhabaat mein Iqtidaar haasil karne ke liye BJP, hukmaran TRS aur congress se rehnumao aur cadre ko Raghib karne ki hikmat amliyon par amal pera hai. pehlay hi congress ke kayi dosray ohday daar qaideen Bhagwa party mein shaamil honay ke liye tayyar hain.