Sunday, October 17, 2021
Home Jurm Ustad par lohe ki salaaq se hamla karne wala taalib e ilm...

Ustad par lohe ki salaaq se hamla karne wala taalib e ilm giraftar

New Delhi: Delhi police ne apne school ke ustad par lohe ki salaaq se hamla karne ke ilzam mein 11wi jamaat ke ek taalib e ilm ko giraftar kiya hai. Yeh waqia berooni delhi ke ranhola ke bapar wala mein boys senior secondary school mein paish aaya. Khaati taalib e ilm ko class mein khalal dalte dekhne ke baad ustad ne ladke se kaha tha ke theek se baiton aur pareshani paida karne se guraiz karo is se ladke ko gussa aaya jisne gusse ki haalat mein class ke iqtetaam ke baad apne ustad par lohe ki salaaq se hamla kiya. Hamle ke natije mein teacher ko shadeed chotein aayi aur us waqt woh rithe hospital mein zaire ilaaj hain.

Dawaqane mein zaire ilaaj teacher ka bayan taa hum police hukkam record karne mein kamiyab ho gaye hain. Ronhola police station ke auhdedaro ne yeh bhi inkeshaf kiya ke mulzim ko school intezamiya ki shikayat par hirasat mein liya gaya. Uske khilaf taziraat e hind ki dafaa 308 (mujrimana qatl ki koshish) ke tehat muqadma darj kiya gaya tha. Baad azaa use adalat mein paish kiya gaya jis par use 14 din ki adalati tahweel mein bhaij diya gaya.

School hukkam ne bataya ke 21 saal ki umer ka ladka 11wi class mein do baar nakaam huwa yaad rahe ke 2018 ke October mein is tarha ka ek waqia delhi ke saakit ilaaqe mein saamne aaya tha jahan 8wi jamaat ke ek taalib e ilm ne ek sarkari school mein apne ustad par lohe ki salaaq se hamla kiya tha. Us waqt ki report se pata chalta hai ke teacher ne taalib e ilm ke bag ke ander lohe ki salaaq dekhi thi aur apne walidain ko batane ki dhamki di hai. 12 saala ladke ne school se bhagne se pehle apne ustad par isi lohe ki salaaq se hamla kiya tha.