Auraiyya/Bijnore: Khawateen ke sath khenouni harkatou ke khilaaf badhti hui awaami narazgi ke bawajood esmatdarri ke waqeat thamney ka naam nahi le rahay hain, Aur har din is terhan ke waqeat samnay arhay hain. Uttar Pradesh mein esmatdarri ke muqadmaat darj ho rahay hain. Uttar pradesh ke Auraiyya zila mein ek 18 sala ladki ka mobayyana tor par ighwa kiya gaya aur chalti SUV Car mein is ki ijtimai esmatdarri ki gayi. Is ke ilawa zila Bijnore mein ek 14 sala ladki ko ek nojawan ne zayad-ti ka nishana banaya.
Pehla waqea 29 November ko pesh aaya tha, Lekin ladki ke waalid ki janib se senior ohdedaroun ke khilaaf police ki adam tawajhi ki shikayat ke baad 7 Decemeber ko FIR darj ki gayi thi. Shikayat kanandah ne FIR mein ek fouji jawan aur is ke bhai sameit 4 afraad ka naam bataya hai.
Is FIR mein fouji jawan, Is ke bhai aur deegar 2 afraad ke khilaaf ijtimai esmatdarri, Mujremana dhamki, Ghalat tareeqay se qaid karne aur daketi ke ilzamaat ke tehat muqadma darj kiya gaya hai.
Shikayat mein darj ki gayi tafseelaat ke mutabiq, Mutasirah ladki two wheeler gaadi par apni coaching institute ja rahi thi ke, 29 November ko usay 4 afraad ne aghwa kar liya. Ladki ne ilzaam lagaya ke mulzimoun ne chalti car mein is ke sath 2 ghantay tak zayad-ti ki aur is ke baad usay pheink diya. Aur unhoun ne police ko ittila dainay par jaan se maarny ki dhamki di. Is ke baad mutasirah ladki kisi terhan apne ghar pohanchi aur apne walidain ko tafseelaat batayi. Ladki ke waalid ne kaha ke inhen apni beti ki hifazat ki fikar thi, Is liye unhoun ne fori tor par police ko is maamla ki ittila nahi di.
Ladki ke waalid ne bataya ke ”komba ke afraad ke israar par, Mein yakam Decemeber ko FIR darj karne ke liye khawateen police station gaya, Lekin khawateen police ne hamein wahan se bhaga diya. Is ke baad mein dusray hi din SHO se milnay gaya, wo bhi madad nahi kiya“.
Tab ladki ke waalid ne Superintendent police ( SP ) se mulaqaat ki, Jinhoun ne ladki ko tibbi muaina ke liye bheja. Report mein jinsi hamlay ki tardeed ki gayi hai, Aur jism par zakhamo ke nishaan miley hain. Police ke mutabiq, Fouji jawan ka pata lagaya hai, Jo Allahabad ka rehne wala hai aur is se pooch taach ke liye ek team tashkeel di gayi hai“.
Dusre waqea mean, 14 sala ladki ko pados mein rehne walay ek nojawan ne ighwa kiya aur hafta ke roz is ke sath zayad-ti ki. police ne Bijnore zila ke Prithvipur gaon se talluq rakhnay walay mulzim Shainky Singh ke khilaaf IPC aur POCSO Act ki dafaa 376 ( esmatdarri ) ke tehat muqadma darj kiya hai aur mutasirah ladki ko itwaar ke roz tibbi maayne ke liye district hospital bhaij diya gaya hai.
Sath hi, Mutasirah ladki ke chacha ke khilaaf bhi mutasirah ladki ke aghwa ke mulzim ki madad karne ka muqadmah darj kiya gaya hai. Usay ladki ke chacha ki janib se lift ki peshkash ki gayi, Jis ne baad mein mulzim ko apni bhateeji ko apni bike par school chode ne ke liye kaha tha. Dono mulziman ki giraftari abhi nahi hui hai. –YTN STAFF