Dubai: UAE mein muqeem ghair mulkion ki wapsi taiz ho gayi hai. UAE anay wali parwaazon mein Reservation sad feesad hai. Khaas tor par Misar, Urdan, Pakistan, Hindostan aur Sudan se anay wali tamam parwaazon mein jagah khaali nahi hai. Muqami media ke mutabiq sayahati Agencies ke zimma daraan nay badi tadaad mein muqeem ghair mulkion ki wapsi ke asbaab ke hawalay se kaha ke pehla sabab to ye hai ke UAE mein waba se bachao ke liye muqarrar SOP ki pabandi ke baais muqeem ghair mulkion mein itminan hai.
Dosra bada sabab ye hai ke muqeem ghair mulkion ki UAE wapsi par se pabandiyan hathali gayi hain jabkay UAE mein coronavirus se bachao ki tadabeer mo-asar hain. Sayahati agencies ke zimma daraan neh kaha hai ke jis terhan UAE anay wali parwazein bhari huvi aa rahi hain waisay hi UAE se beron mulk safar karne walon ki tadaad bhi roz barros badh rahi hai. Bohat saaray ghair mulki baqi mandah chhutti apne apne watan mein guzaarna chahtay hain. Inhen ye bhi itminan hogaya hai ke ab wapsi mein koi pareshani nahi hogi.
Hazaron ki tadaad mein muqeem ghair mulki beron mulk safar ke liye Reservation karwa rahay hain jabkay UAE shehri aur bohat saaray muqeem ghair mulki bhi Europe mumalik sair-o-sayahat ke liye jane ke khawahish mand nazar arhay hain taham is saal Europi mumalik jane walon ki tadaad guzashta barson ke muqablay mein bohat kam hai. Nirfa sayahati company ke Executive Chairman Ala Al Ali ne kaha hai ke Pakistan, Hindostan, Misar, Urdan aur Sudan se koi bhi parwaaz aisi nahi aa rahi hai jis ki ek bhi nashist is waqt khaali ho jabkay wapsi ke ijazat naame ki pabandi tak un mulkon se anay wali
parwaazon ke musafir pachaas feesad se ziyada nahi hotay thay.