Dubai: UAE jahan is waqt Indian Premier League ka ek bada Tournament kamyabi ke sath rawan dawaan hai ab UAE ke awam ke liye ek aur khush khabar hai ke hukkaam ne Function Halls aur gharon ke ilawa khaimon mein shadi ki taqarib munaqqid karne ki ijazat di hai lekin yeh ijazat Corona qawaid ke sharait par amal aawri se mashroot hai.
Sarkari khabar rasan Agency WAM ke mutabiq Dubai mein 22 October se rehaishi ilaqon mein hotels, Halls, Gharon, Aarzi maqamat aur khaimon mein dobarah shadi ki taqarib munaqqid karne ki ijazat di gayi hai.
Bohraan aur Disaster Managment ki Supreme Committee ne kaha ke ahal khanah aur shadi ke maizban ke liye zaroori hai ke awam ki hifazat ko yakeeni bananay ke liye tamam Coronavirus ahteyati hidayat par amal karna hoga. Qawaid ki tameel nah honay ki wajah se khilaaf warzi karne walon ke khilaaf karwai ki jaye gi. Mutahidda Arab Emarat mein ab tak 115,602 coronavirus se mutasirah mareez Record hue hain jabkay 107,516 sehat yab hue hain ilawa azeen 463 amwaat Record ki gayeen.
UAE mein Function Halls mein shadi ki taqreeb mein ziyada se ziyada 200 afraad ki gunjaish ki ijazat di gayi hai jabkay khaimay aur makanaat ziyada se ziyada 30 afraad shadi ki taqreeb mein shirkat kar saktay hain. Report mein kaha gaya hai ke shirka ko har waqt chehra par mask pehnana hoga aur woh tab hi utaar satke hain jab un ki mizon par ziyada se ziyada 5 afraad mojood hon.
Meheman ko aamnay samnay nahi baithna chahiye aur 1.5 meter se ziyada faasla rakhna zaroori hoga jabkay mizin ek dosray se kam az kam 2 meter ke faasla par rakhni chahiye. Report mein mazeed kaha gaya ke Halls, hotel, Gharon, Aarzi maqamat aur khaimon mein honay wali taqarib 4 ghantay ke waqfa se tajawaz nahi karna chahiye. Committee ne kaha ke buzurag afraad aur jin logon ko khansi aur bukhaar samait daimi halaat ya alamaat hain un ko bhi is terhan ki taqarib mein shareek nah honay ki takeed ki gayi hai.