Dubai: Coronavirus ne China se agay badhatay hue kayi deegar mumalik ko apni lappet mein le liya hai aur ab mutahidda Arab UAE mein ek khandan ke is mohlik virus se mutasir honay ki khabar samnay aayi hai. Hukkaam ke mutabiq UAE mein Coronavirus ka shikaar honay walay ek khandan ke mutadid afraad ka inkishaaf huva hai. Emarati news agency ( Vam ) ke mutabiq Coronavirus ka shikaar khandan China ke mutasirah ilaqay Wuhan se UAE pouncha tha.
Wizarat sahet ne apne aalamia mein kaha hai ke virus ka shikaar honay wala khandan tibbi nigrani mein hai aur is ki haalat qaboo mein hai. Wizarat ne kaha hai ke sahet ke shobay se wabsta tamam idaray mulk ke deegar mutaliqa idaroun ke sath mil kar Coronavirus ke insidaad ke liye mushtarqa koshishen kar rahay hain.
Wizarat ne kaha hai ke is hawalay se tamam tar ahteyati tadabeer ikhtiyar ki gayeen hain jabkay aalmi idaara sahet ki hidayat aur taawun bhi haasil hai. Coronavirus ke hawalay se halaat qaboo mein hain. Mutaliqa idaray intahi tandahi se kaam kar rahay hain. Shehrioun aur muqeem ghair mulkioun ko ghabranay ki zaroorat nahi. Wizarat ne kaha hai ke mulk mein sahet aama par kaam karne wala nizaam aur wabai amraaz ke insidaad ke liye kaam karne walay idaray intahi chokanna hain. –YTN STAFF