Mumbai mein aik aisa fankar bhi hai jo type writer se Potrait banata hai. Media ke mutabiq Mumbai shehar ke aik ghar se din raat clickety-clack, Clickety-clack ki aawazen aati thiin, pata karne par maloom huwa ke aik zayeef shehri ‘ Chandra Khand Bhide’ type writer ki madad se naya art takhleeq kar rahay hain. 72 sala Chandra Khand Bhide ney media se guftagu karte huwe bataya ke woh type writer ki madad se kayi mashoor shaksiaat ke Potrait bana chuke hain jo kaafi had tak un se mumasilat rakhtay hain. Aik interview mein Chandra Khand Bhide ney bataya ke woh ab tak Gandhiji, Jawarlal Nehru, Indira Gandhi, Charlie Chaplin Rajiv Gandhi, Kapil Dev, Bala Thackray aur Harry samait kayi mashhoor shaksiaat ki tasaveer bana chuke hain. Unhon ney kaha ke un ka shouq un ka jazba hai. Bhide ney bataya ke woh 12 se zayed noumayshon mein hissa le chuke hain aur ab woh apne ilaqe ke aik bohat baday star ban gaye hain jabkay iss se qabl woh Union Bank of India ke Administrative Department mein Clerk ki haisiyat se kaam karte thae. Unhon ney kaha ke un ki jawani se yeh khwahish thi ke woh Art School jayen taakay Art ki mukammal taleem un ko faraham hosakay lekin un ke waldain Art School ke akhrajaat bardasht nahi kar saktay thae aur isi liye woh aik typist ban gaye. Bhide ney mazeed kaha ke jab unhon ney type writer ke zareya Potrait bananay ka kaam shuru kya to woh uss waqt mehez (x) ka istemaal karte thae phir woh aahista aahista baqi huroof ko bhi apni tasweeron mein shaamil karne lagey Bhide ney bataya ke unhon ney iss kaam ka aagaz apne bhagwan Ganesh ki tasaveer bananay se kya. Media reports ke mutabiq Bhide ko aik Potrait bananay mein 15 minute ka waqt lagta hai jabkay is Potrait mein sirf rang bharnay mein unhen kayi ghantey lag jatay hain Bhide ney bataya ke chunkay type writer mein ‘Delete’ ka option maujood nahi iss liye kisi bhi ghalti ki soorat mein unhen poori tasweer dobarah se banana padti hai. Interview ke ekhtataam mein unhon ney bataya ke woh ab Malika Elizebath, Donald Trump aur kayi badi shaksiaat ki tasaveer bananay ka iradah rakhtay hain .