Twin Bomb Blasts. 2 mulzimin ko phansi aur aik ko umar qaid ki saza

Hyderabad. Hyderabad mein August 2007 mein Lumbini Park aur Gokul Chat Bhandar mein huwe twin Bomb blasts mein maakhoz 2 mulzimeen Anique Shafeeq Sayeed aur Ismail Choudhry ko Hyderabad ki khusoosi adalat ney phansi ki saza sunadi hai jabkay do mulzimeen Farooq Sharfuddin Turkash aur Mohammad Sadiq Asrar Sheikh ko 4^th  September ko ilzamaat mansuba se bari kardiya gaya tha. Aik aur mulzim Tariq Anjum ko Cherlapally Jail mein qaim aik khusoosi adalat ney muqadma ke 7 ahem mulzimin ko panah dainay aur un ki madad karne ka qusoorwaar paaya hai aur usay umar qaid ki saza sunai gayi hai. Is mulzim ke khilaaf deegar mulzimin ke sath fard e jurm aayed nahi kiya gaya tha balkay Adalat mein mutawazi muqadma mein samaat ki jarahi thi. Yaad rahay ke Khusoosi Adalat ne 4^th  September ko is muqadma mein 2 mulzimeen Anique Shafeeq Sayeed aur Ismail Choudhry par fard e jurm aayed kardiya tha aur un ki saza ke liye aaj ka din muqarrar kiya tha. 25^th August 2007 mein shaam ke waqt Lumbini Park aur Gokul chat Bhandar mein huwe Bomb dhamako mein 42 afraad halaak aur 50 se zayed zakhmi hogaye thay.