Hyderabad. Telangana Rashtra Samiti mein tashkeel e Telangana ke baad sailaab ki manind leaders aur Workers shaamil hotay chalay jarahay thae, hatta ke guzishta dinon tak bhi yeh silsila jari tha. Guzishta intekhabaat mein TRS ki zabardast lehar ke bawajood doosri partiyon ke Ticket par muntakhib honay walay aksar awaami numaindey bhi TRS mein shumoliat ikhtiyar karliye thae magar ab aisa lagta hai ke barsar e iqtedar TRS se qaayideen ki kinara kashi ka aaghaz honay laga hai. Telangana Rashtra Samiti ke Rukn Qanoon Saaz Council Mr. Bhuphathi Reddy ney aaj Telugu Producer Bandla Ganesh ke hamrah Sadar Congress Mr. Rahul Gandhi se mulaqaat karte huwe Congress Party mein bazabta shamoliat ikhtiyar karli hai. Mr. Bhupathi Reddy ney guzishta budh ko yeh elaan kiya tha ke woh Congress Party mein shumoliat ikhtiyar karlen ge chunkay TRS ke andaaz karkardagi se aajiz aachukay thay. Unhon ney kaha ke TRS Party qiyadat ney Telangana tehreek ke dauran kaleedi rule ada karne walay qaayideen ko nazar andaaz kardiya hai. Congress Party mein shumoliat ke baad akhbaari numaindon se baat cheet karte huwe Mr. Bhupathi Reddy ney kaha ke woh Nizamabad Rural halqe Assembly se TRS ke umeedwaar maujooda Rukn e Assembly Mr. Baji Reddy Gorverdhan ke khilaaf muqaabla karne ka iradah rakhtay hain. Unhon ney kaha ke Baji Reddy Goverdhan un ki qurbanion ke baayis pichle 10 baras se Nizamabad se Assembly mein noumaindagi kar rah hain. Unhon ney yeh kahete huwe ke TRS Party par narazgi ka izhaar kiya ke un tamam usoolon ko faramosh kardiya gaya jin par Party ki buniyaad rakhi gayi thi. Baaz zaraye ka kahena hai ke zila Nizamabd ke hi aik Senior Leader o Rukn Rajiya Sabha Mr. D Srinivas jin hein party ney buri terha nazar andaz kardiya hai woh bhi TRS ko khairbad kahete huwe Congress Party mein shumoliat ikhtiyar kar lenay walay hain.