Hyderabad : TRS par teen Talaq bil maamla par muslim tabqa ke sath ghaddari ka ilzaam lagatay hue, hyderabad city congress committee ( HCCC ) ke shoba aqliat ke chairman Sameer wali ullah nay chaharshambe ke roz TRS mein shaamil tamam muslim qaideen se mutalba kiya ke inhen fouri tor par apne ohdon se mustafi hojana chahiye.
Unhoun nay kaha ke ”Telangana ke musalmanoun nay wazeer-e-aala KCR par etemad kiya aur do baar intikhabaat mein unki party ko vote diya. aur unke is daaway par yaqeen kiya ke TRS secular aur BJP mukhalif jamaat hai.
Congress ki taraf se yeh aagah karne ke bawajood ke TRS BJP ki B-team hai, musalmanoun nay aam intikhabaat mein TRS umeedwaron ke haq mein vote diya. Taham TRS nay vote daalnay se parhaiz karte hue Rajya sabha mein teen Talaq bill ki manzoori mein BJP hukoomat ki himayat karte hue musalmanoun ke sath ghaddari ki hai.
Sameer nay ilzaam lagaya ke nokari aur taleem mein 12 % reservation dainay ke waday par wazeer-e-aala nay musalmanoun ko dhoka diya hai. wazeer-e-aala nay Iqtidaar mein anay ke chaar mah ke andar 12 feesad quota nafiz karne ka wada kiya tha lekin wada poora nahi kiya.
Unhon nay kaha ke sabhi muslim rehnuma muslim tabqa ke sath ghaddar karne ke khilaaf TRS se door hon. sameer nay yeh bhi mutalba kiya ke wazeer-e-dakhla Mahmood Ali ko TRS party ke parliament mein bill wasita tor par teen Talaq bil ki himayat ke faisla ke khilaaf bator ehtijaj kabeena aur MLC ke ohda se istifa dena chahiye.
Sameer nay kaha ke Bodhan ke MLA Aamir shakeel, MLC Farooq Hussain aur fareed uddin, waqf board ke sarbarah Mohammad Saleem , urdu academy ke chairman Raheem uddin ansari sameit mukhtalif corporation ke chairman’s ko bhi fori tor par apne ohdon se mustafi hojana chahiye. –YTN STAFF