Hyderabad: Telangana ki hukmaran jamaat TRS ke rukan Assembly S Ramalinga Reddy alalat ke sabab jumaraat ki awleen sa-aton mein shehar Hyderabad ke ek Private Hospital mein chal basey. Un ki omar 57 thi. Pasmandgan mein biwi ke ilawa ek farzand aur ek dukhtar shaamil hain. Wo Dubak Assembly halqa se muntakhib hue they. Guzashta chand dinon se sahet ke masail ke sabab wo guzashta hafta ek Private Hospital mein daakhil kurwaye gaye they jahan unhoun ne ilaaj ke douran aaj subah aakhri saans li.
4 martaba ke rukan Assembly-o-sabiq sahafi ny 2004 mein Dubak Assembly halqa se pehli martaba Assembly mein numaindagi ki thi. 2008 ke zimni intikhab mein wo rukan Assembly muntakhib hue. 2018 ke Assembly intikhabaat mein bhi wo muntakhib hue. Un ki laash aakhri rasomaat ke liye Dubak mandal muntaqil kar di gayi. Un ki mout ki ittila par Dubak Assembly ke afraad saktah mein aagaye. Wo wazeer-e-aala K Chandrashekhar Rao ke kaafi qareebi samjhay jatay they jinhon ny alahda riyasat Telangana ki tehreek mein sargaram hissa liya tha. Un ki mout par wazeer-e-aala ny gehray dukh ka izhaar kiya hai. Unhoun ny ghumzdaa arkaan khandan se taaziyat ka izhaar kiya. TRS ke beshtar leaders aur wuzra ne bhi un ki mout par gehray dukh ka izhaar kiya.