Chandigarh : Tiktok ki Maroof star sonali Phogat BJP mein shaamil hogi hain Haryana mein jaisay jaisay assembly intikhabaat ki tareekhen qareeb aarahi hain waisay waisay wahan ka siyasi mahol garam hota ja raha hai.
Haryana assembly intikhabaat mein udhampur assembly halqa se Maroof Tiktok star Sonali Phogat ko BJP ne apna umeedwaar banaya hai.
Sonali ke ticket ka jaisay hi elaan hua waisay hi unke puranay Tiktok video viral honay lagey hain. Sonali Phogat ne kaha ke unko khud andaza nahi tha ke ticket milnay ke baad un ke puranay Tiktok video viral hojayenge.
Udhampur assembly halqa se sonali Phogat ka muqaabla congress ke Kuldeep se hoga. saal 2014 ke intikhabaat mein Kuldeep ne alag party bana kar intikhabaat lada tha aur wahan se intikhabaat jeetay bhi they. saal 2014 mein Kuldeep ka muqaabla indian national lok dal ke singh beniwal ke sath hua tha. is martaba indian national lok dal se is assembly halqa se Rajesh Godra maidan mein hain.
Wazeh rahay ke Sonali ke shohar sanjay Phogat BJP ke rehnuma the, unke inteqal ke baad Sonali Phogat BJP mein shaamil hogayi theen. Party ne inhen reyasti khawateen morcha ka naib sadar muqarrar kiya tha. Sonali Phogat ne kaha ke jeet ke baad woh Tiktok ka istemaal ilaqa ki taraqqi aur hub-ul-watni ke liye karengi. unhon ne kaha ke BJP ne inhen ticket Tiktok ki wajah se nahi diya kyunkay woh guzishta 12 saal se BJP se wabasta hain. –YTN STAFF