Tihar jail mein hindu qaidiyoun ka roza azad shehriyoun ke liye ek sabaq

New Delhi: Hindustan bhar mein is waqt jahan nafrat, taasub aur firqa waranah mahol ko garma jaraha hai un tamam halaat mein ek khabar Hindustan ki ganga jamuni tahazeeb ke liye khush aaind bhi hai jis ne mulk mein hindu muslim ittehaad ke liye ek  nayi raah hamwar ki hai aur yeh khabar kisi siyasi jamaat ya Shahi gharanoun se nahi balkay jail se aa rahi hai jahan 150 se zayed hindu qaidi ki saza kaatnay ke sath mah-e-mubarak Ramadan mein apne muslim doston ka sath dainay ke liye rozay ka ehtimaam kar rahay hain. Hindustan times ki khabar ke mutabiq Tihar jail mein 150 se ziyada hindu qaidi roza rakh rahay hain. Tihar jail ke hukkaam ne kaha hai ke guzashta saal ki bah nisbat is saal jail mein Zordaar hindu qaidiyoun ki tadaad mein izafah hua hai .

Tihar jail ke Superintendent ke mutabiq guzashta saal jail mein hindu rozay daaron ki tadaad 59 thi lekin is saal is tadaad mein 3 gina izafah hua hai aur May ke pehlay haftay mein Tihar jail mein roza rakhnay walay hinuds ki tadaad 150 tak pohanch chuki hai. yeh sirf Tihar jail ka hi ek  waqea nahi hai balkay Hindustan bhar mein mukhtalif jail khaanoon mein hindu qaidiyoun ne apne jail superintendent ko mutala kiya hai ke woh apne musalman doston ke sath izhaar yakjahti ke liye roza rakhna chahtay hain. Tihar ke mukhtalif jailon mein jab jail superintendent ne apne hindu aur muslim qaidiyoun ke liye roza ke ehtimaam ke liye sehri aur iftaar ka intizam karna shuru kya to yeh tadaad 16,665 hogayi jis mein kam az kam hindu roza daaron ki tadaad 2,658 record ki jarahi hai .

Hindu qaidiyoun ki janib se roza ka ihtimaam karne ki mukhtalif wajohaat jail hukkaam ne batayi hain. jail hukkaam ke mutabiq roza ka ihtimaam karne walay aksar hinduon nr muslim doston ke sath izhaar yakjahti ko bunyadi wajah qarar di hai. shayad yeh is haqeeqat ka izhaar nahi karna chahtay ke woh qaid khanaay mein mazhab se qareeb hosakay hain aur Rohani sukoon chahtay hain. jail hukaam ke mutabiq qaid ki saza ke aaghaz ke sath hi 80 taa 90 feesad qaidi mazhabi umor ki anjaam dahi mein ziyada dilchaspi lainay lagey hain aur unke is bartav aur tabdeeli ke baais aman mein misbet paish qadmi hui hai jis ke baad unki sazaon ki muddat bhi kam karte hue inhen jald rihayi bhi mil jati hai .

Jail mein hinduo ke Ramadaan ul mubarak mein rozay rakhnay ke alawa aisi hi khabrain Hindustan bhar ki jailon se aarahi ke mauqa par bhi aati hain jab kayi muslim qaidi apne hindu sathiyon ke sath roza rakhnay ko tarjeeh dete hain aur yeh rujhaan sirf Tihar jail mein hi nahi hai balkay Hindustan bhar ki mukhtalif jailon mein parwan chadh raha hai .

Jailon mein mah ramadaan ul mubarak mein muslim qaidiyoun ke sath hinduo ka bhi roza rakhna aur jail hukkaam ki janib se iftaar mein khajoron ke sath rooh afzaa faraham karne ke alawa baaz maqamat par bahar se Hufaz ka intizam karte hue namaz taraweeh ka bhi ihtimaam karna hindu muslim ittehaad ka ek  Aala tareen namona hai jabkay jail ki canteens mein iftaar mein istemaal honay wali ashiya ka bhi stock faraham kiya ja raha hai .

Jail ki chaar deewari mein bohat kuch hota hai ba-hasiat shehri hamara yeh bhi farz hai ke jail ki chaar dewaron ke darmain jin afraad ko masail ka saamna karna padraha hai aur woh ghair zaruri pareshaniyon ki wajah se zehni tanao ka shikaar ho rahay hain aur inhen yeh gham bhi deemak ki tarhan khaye jata hai ke jab jail se unki rihayi hogi to samaaj kis tarhan inhen qubool kere ga kyunkay ek  janib inhen samaaj ke bartav ki wajah se zehni pareshani la-haq hoti hai to doosri janib hamaray nizaam mein mojood khamion ki wajah se jo takheer hoti hai is se un qaidiyoun ke sabar ka pemana labraiz hojata hai .

Jail aur qaidiyoun ke masail kaafi tashweesh naak aur sangeen hotay hain. is taraf tavajja nahi di jati halaanke 2003 mein insani haqooq ke qaumi commission ke chairman justice AS Anand ne jailon mein gunjaish se ziyada qaidiyoun aur deegar sangeen masail ki simt tavajja mabzol karwai thi. justice AS Anand ne aitraaf kiya tha ke yeh badi dard naak haqeeqat hai ke 75 feesad se ziyada jo qaidi jail mein hain woh Zaire dariyaft  hain is ke alawa ek  dard naak haqeeqat yeh bhi hai ke aisay Zaire dariyaft  qaidiyoun ki bhi ek  badi tadaad jailon mein zamanat ke bawajood hunooz muqeed hai kyunkay un ke paas zamanat ke liye ada karne ke liye raqam nahi hai. algaraz jahan jail mein hindu muslim ittehaad ka muzahira kiya ja raha hai to jail ke bahar hum azad shehrion ka yeh farz hai ke qaidiyoun ki rihayi ke liye apni zakat aur khairaat ka istemaal karen taakay azaadi se kayi cheharon par haqeeqi khushee bikhar sakay.  –YTN STAFF