Hyderabad. Rajya Sabha mein Leader of Opposition Mr. Ghulam Nabi Azad ney kaha ke Telangana riyasat ki tashkeel sirf aur sirf Congress ki dain hai iss mein Telangana Rashtriya Samiti ka koi role nahi hai. Mr. Ghulam Nabi Azad ney Hyderabad mein akhbaari numaindon se baat cheet karte huwe kaha ke alhaidah Telangana riyasat ki tashkeel sirf aur sirf Congress Party ki wajah se huwi hai. TRS Party ka iss mein koi role nahi raha hai. Unhon ney kaha ke alhaidah riyasat ki tashkeel ke liye Telagana se talluq rakhney walay Party ke arkaan e Assembly, arkaan Qanoon Saaz Council aur Party ke ohdedaron ney Party qiyadat par zor diya tha ke alhaidah riyasat tashkeel di jaye jis par Congress Working Committee ke ijlaas mein ghaor o khoz kiya gaya. Congress Working Committee ke ijlaas mein iss khusoos mein qarar daad manzoor ki gayi aur phir Dr, Manmohan Singh ki hukoomat ney aik qanoon ki tadween karte huwe Praliament ke dono aiwanon mein is ko Manzoor kerwatay huwe naayi riyasat ki tashkeel ko yakeeni banaya hai. Unhon ney kaha ke TRS chahtay huwe bhi Telagana riyasat tashkeel nahi dey sakti hai. Yeh sirf Congress hi hai jis ney alhaidah Telagana riyasat ko tashkeel diya hai. TRS ka yeh daawa ke Telagana is ki wajah se tashkeel paaya hai ghalat hai. Yeh poochney par ke chaar saal baad ab aap yeh daawa kyun kar rahay hain twanhon ney kaha ke Media ney is khosos mein chaar saal baad sawal kiya hai is liye woh ab haqeeqat bata rahay hain.