Hyderabad : Telangana mein Covid 19 ke 1982 naye mamlaat darj kiye gaye jiske sath hi riyasat mein is waba se mutasir honay walon ki tadaad 79,495 tak jaa pohnchi.
Guzishta roz is Infection se 12 afraad ki mout hogayi. is tarhan riyasat mein ab tak is mouzi marz se marney walon ki tadaad 627 hogayi hai.
Director mehakma sahet aama wo khandani behbood ki janib se jari kardah bulletin ke mutabiq riyasat mein 1982 naye mamlaat ka indraaj kiya gaya hai. taqreeban 1669 afrad ruba sahet hue hain jinko riyasat ke mukhtalif aspatalon se ghar jane ki ijazat dey di gayi hai.
Is tarhan riyasat mein robah sahet honay walon ki tadaad 55,999 hogayi hai. ohdedaron ne kaha kay riyasat mein 22,869 sargaram mamlaat hunooz hain aur 16,112 afraad ko gharon mein alag thalag kardiya gaya hai.
Hukoomat ne unko mashwara diya hai ke woh ahtiyat se rahen aur gharon se bahar nikalne ki zaroorat nahi hai. sahet ke hukkaam ne kaha ke riyasat ke kayi hissoun aur bil-khusoos Hyderabad mein mukhtalif ilaaqon mein corona ki jaanch ki jarahi hai. mehakma sahet ke hukkaam ne nishandahi ki hai ke ta haal Telangana bhar mein 6,13,231 muanay karwaye gaye.
Guzishta chand dinoun ke douran hyderabad mein amwaat ki sharah mein kami waqay hui hai taham hukoomat ne awam-un-naas ko mashwara diya ke woh mohtaat rahen. mehakma sahet ke naye bulletin ke mutabiq riyasat ke mukhtalif maqamat par darj kardah naye corona ke mamlaat ki tafseel is tarhan hai. GHMC- 463 Medchal – 141 Rangareddy – 139 Karimnagar- 96 Gadwal – 93 Jangoan – 78 Warangal Urban – 71 Peddapalli – 71 Bhadradri Kotagudam – 64 Kamareddy- 62 Nalgonda- 59 Nizamabad- 58 Siddipet- 55.
Director general sahet-e-aama Srinivas Rao ne umeed zahir ki GHMC hudood mein august ke awakhir aur deegar ilaqon mein September awakhir tak corona ke mamla per qabu paya jaega.