Hyderabad: Telangana mein Corona ke taaza mareezon ke manzar aam par anay ki nisbat virus se sehat yab honay walay afraad ki ziyada tadaad dekhnay mein aa rahi hai jo kay raahat ki baat hai. Mutaliqa hukkaam ke bamujab Telangana mein pichlle 24 ghanton ke douran report honay walay naye corona mareezon ke muqablay mein Covid-19 se ziyada afraad sehat yab hue hain. Wabai amraaz se majmoi tor par 2259 afraad sehat yab hue hain jabkay 2207 afraad virus se mutasirah paye gaye. 9 mazeed afraad ne Covid se dam toad diya, Jis se halakaton ki tadaad 1116 hogayi.
Director Public Health and Family Welfare ke daftar se jari media bulliten ke mutabiq, Fi lakh abadi ke test kiye gaye namoonay mazeed behtar hokar 79206 ho gaye. Coronavirus ke phelnay ke ibtidayi ayyaam mein Hyderabad mein mareezon ki tadaad ziyada thi aur naye mareezon ke dawakhanon se rujoo honay ki tadaad bhi kaafi ziyada thi lekin jab lockdown par sakhti se amal honay laga to Hyderabad mein corona mareezon ki tadaad mein kami honay ke sath azlaa mein coronavirus phelnay laga tha. Haliya dinon mein awam ki janib se Corona virus se khaif honay ke bar aks is mohlik bemari ke khilaaf ahteyati tadabeer ne corona mareezon ki tadaad mein kami mein ahem rule ada kiya hai.