Hyderabad : Telangana ke wazeer-e-sehat Etela Rajender nay aaj markaz se mutalba kiya ke woh sehat ki reyasti schemes ko munasib funds dey kar madad kare. unhoun ney aaj Delhi mein markazi wazeer-e-sehat Harish vardhan se mulaqaat ki aur inhen Telangana riyasat mein sehat ki sahuliyaat mein izafah ke mansooboun ke baaray mein aagah kiya, jin mein Secunderabad ke Gandhi hospital aur Hyderabad ke Niloufer hospital mein super specialty blocks shaamil hain. aur azlaa mein sehat ki khidmaat ko badhaane ke liye funds talabb kiye.
Harish Vardhan nay kaha ke markazi hukoomat, riyasat-e-Telangana ke azlaa mein puranay hospitals ko jadeed bananay mein madad karegi aur deegar health ke khidmaat ke liye fund faraham karne par bhi ghhour karegi.
Baad azan media numaindon se baat karte hue Rajendar nay kaha ke unhoun nay markaz par zor diya ke woh riyasat mein sehat ki mukhtalif sahuliyaat ke liye fund muhaiyya kare. unhon nay kaha, Gandhi aur Niloufer hospitals mein super specialty blocks ke qiyam ke alawa, hum nay markazi wazeer se appeal ki ke woh Khammam aur kareem nagar district head quarter mein medical college qaim karne mein madad karen.
Unhon nay markaz se naye azlaa ke hospitals ko up grade karne aur dihaton mein sehat ke camps ke sath sath Falah wo behbood ke marakaz ko un grade karne ki bhi darkhwast ki.
Unhon nay kaha ke hum nay Highways par trauma care center qaim karne ki koshish ki, markaz par zor diya gaya ke woh riyasat KCR kits scheme ke sath taawun karen. Etela Rajender nay mazeed kaha ke Warangal mein Kaktiya medical college aur RIMS specialty blocks Adilabad mein khole jayenge. –YTN STAFF