Hyderabad : Telangana ke wazeer-e-dakhla Mohammad Mahmood Ali ke pote ka ek Tik Tok video Social media par viral hua hai. jis mein woh ek sarkari gaadi ke ooper baithe hue nazar aarhey hain, jabkay iska ek dost ek Police ohdedar ko filmi andaaz mein dhamki day raha hai.
Jumeraat ko Social media par viral hue mazkoorah video mein, Furqan Ahmed ek sarkari ohdedar ki car ke baanat par baithe hue dikhayi day rahay hain, aur unka dost inspector general of police ( IGP) ka gala kaatnay ki baat kar raha hai.
zaraye ke mutabiq mazkoorah video Osmaan poora ilaqa mein waqay wazeer-e-dakhla ki rehaish gaah ke samnay shoot kiya gaya tha. aur jis gaadi par woh baithe they, woh wazeer-e-dakhla ke qaafla ki gaadi thi.
Is maamla se mutaliq kisi bhi police ohdedar ya wazeer-e-dakhla ki janib se koi radd-e-amal samnay nahi aaya hai. –YTN STAFF