Hyderabad : Andhra Pradesh aur Telangana ke kuch hissoun mein itwaar ke roz subah mein zalzalay ke halkay jhatkay mehsoos kiye gaye, lekin is se kisi jani nuqsaan ki ittila nahi hai. zaraye ke mutabiq, Telangana ke suryapet zila mein, Mellacheruvu aur Chintalapalem division mein raat 2.37 bajey 3 se kam ki shiddat ka zalzala record kiya gaya.
Muqami logon CCTV mein record ki gayi video footage ke mutabiq zalzalay ki aawaz ke sath cheezoun ko hiltay hue dekha gaya. Telangana mein raat ke qareeb 2.35 bajey qareebi Khammam, Bhadradri-Kothagudem and Suryapet mein kam shiddat ka zalzala aaya.
Aawaz se ghabraye hue rehaishi apni imaartoun se bahar nikal aaye. is se koi amlaak ko nuqsaan nahi hua, kyunkay yeh zalzala kuch seconds ke liye aayatha. halki shiddat ke is zalzalay ke baad rehaishion mein ye khauf hai ke kuch waqt baad ya ek do din baad dobarah zalzala aasakta hai. zila krishna ke Jaggaiahpet aur Nandigama ilaaqon mein bhi zalzalay ke jhatkay mehsoos kiye gaye. –YTN STAFF