New Delhi: Hindustan mein Coronavirus ke phelao mein Delhi ke Nizamuddin ko Vilen ki terhan pesh karne mein Hindustan ke qaumi Media ne koi kasar nahi choadi thi lekin wahi Nizamuddin Markaz jaisay Coronavirus ka Markaz bitanay aur Corona Jehaad batanay mein koe kasar nahi chodney waloun ke mun par ek zor daar tamancha is waqt laga jab Markaz se talluq rakhnay walay 300 Tableeghi arkaan jo kay Coronavirus se sahet yab huve hain unhoun ne apna Plasma atiyah dainay ka kaam anjaam diya taakay Corona se mutasirah mareezoun ka ilaaj hosakay jin par adwayat ka asar khatam hochuka hai.
COVID-19 se sahet yab honay ke baad Tableeghi Jamaat ke 300 arkaan ne Coronavirus ke mareezoun ke ilaaj ke liye apna Plasma atiyah karne ke liye dastakhat kiye hain. Sultanpuri se talluq rakhnay walay Tableeghi Jamaat ke 4 arkaan pehlay hi apna Plasma atiyah kar chuke hain. Zaraye ne bataya ke 300 arkaan ne Plasma atiyah karne ke liye dastakhat kiye hain aur Delhi hukoomat ki taraf se jari kardah razamandi farmoun ko pur kiya hai.
Qabal azeen Delhi ke Nizamuddin Markaz mein riyasat Tamil Nado se shirkat karne walay Tableeghi Jamaat ke wo arakeen jin mein Coronavirus ki tashkhez huvi thi aur wo sehatyab honay ke baad Corona ke mareezoun ke ilaaj ke liye Plasma atiyah kiya tha jis ke baad Tableeghi Jamaat ke arakeen jin par kadi tanqeed ki gayi thi inhen is amal ke baad Hindustan mein Hero kaha ja raha hai aur ye bhi kaha ja raha hai ke Hindustan se Corona ka khatma karne mein Tableeghi Jamaat ahem rule ada kar sakti hai.
Delhi ke Nizamuddin Markaz mein shirkat karne walay Tableeghi Jamaat ke arakeen ko na sirf harasan kiya gaya balkay un ke khilaaf muqadmay bhi darj kiye gaye, Twitter par Trained chalaye gaye lekin mushkil ki is ghadi mein Tableeghi Jamaat hi Coronavirus se bachao ke liye maidan mein aayi aur raza karana tor par Plasma atiyah karne ka elaan kiya hai. Tamil Nado ke 1 hazaar se zayed Tableeghi arakeen jin ka Corona Test pehlay misbet phir manfi aaya tha unhoun ne khud ko pesh kiya hai.
Coronavirus ke ilaaj ke liye Plasma Therapy ke istemaal ke hawala se Dr ne kaha hai ke ye Therapy is soorat mein istemaal ki jati hai jab dawa se mareez ka ilaaj nah ho sakay, Isliye usay Plasma diya jata hai aur mareez sehatyab hojata hai. Anti Bodies se mareez mein qouvat mudafat peda hoti hai. Plasma ke liye khoun atiyah karne walay ka bemari se sehatyab hona zurori hai, Uskay liye is baat ka khayaal rakha jata hai ke mareez jo sehatyab huwa kam az kam usay 2 haftay guzar chuke hon. –YTN STAFF