Court of Inquiry miz ilzaam saabit, farayez ai pahlu tahi aur apni Duty ke muqaam ko chodhne ki murtakib Gogoi ke khilaaf Court Marshal ki tayyari.
Srinagar: Indian Army ney Mejor Leetul Gogoi ka Court Marshal General karney ki tayyari karli hai jo Srinagar ki aik hotel mein aik kam umar Kasmiri ladki ke sath qabil e aitraaz haalat mein paye gaye thae jinhein muqami logon ney hotel ke kamrah mein aik ladki ke sath pakad liya tha. Brigadier ke zair qayadat Court of Inquiry ney inhen baadi-un-nazar mein hotel mein aik kam umar ladki ke sath paye janey ka qusoorwaar paaya hai. Fouji Court of Inquiry ney Srinagar ke aik hotel se naujawan ladki ke sath girftar honay walay Bharati Major Leetul Gogoi qusoorwaar qarar dae kar is ke khilaaf karwai ka hukum diya hai. Media ke mutabiq Army Court of Inquiry ney Major Leetul Gogoi ko Srinagar Hotel case mein mujrim qarar dae diya hai. Fouji adalat ney Major Gogoi ki fouji nazam o zabt ki khilaaf warzi par Army Act ke tahet karwaayi ka hukum diya hai. Fouji Adalat ney apney faisla mein kaha ke Major Gogoi ney muqami afraad ke sath kisi bhi qisam ka rishta qaayim karney se mutaliq hidayat ki khilaaf warzi ki aur woh hirasat ke waqt apni Duty ke muqam se door paye gaye thae jab ke ilaqa mein fouji operation bhi jari tha. Yeh nazam o zabt ki sangeen khilaaf warzi hai. Mahireen ka kahena hai ke Adalat ke hukum par Fouj ke hukkaam Major Leetul Gogoi ke khilaaf saza ka taayun kar saktay hain jis mein inhen mulazimat se jabri retire bhi kiya ja sakta hai ya phir Court Marshal bhi kiya ja sakta hai. Rawan saal 30th May ko Major Gogoi Srinagar ki aik Hotel mein naujawan ladki ke hamrah paye gaye thae jis par muqami afraad ney hotel ka gherao kar liya tha taham SP shumali Srinagar ney mudakhilat karte hue muzahireen ko muntashir kar ke major Gogoi aur ladki ko hirasat mein le liya tha. Baad-azan Major Gogi ko un ke unit ke hawale kardiya gaya tha jahan un ka trial kiya gaya. Wazeh rahay ke Major Leetul Gogoi Kashmir mein Bharati Fouj ke dasta Rashtrya Rifle ki 53rd Battalion (Punjab Regiment) ke mutanazia tareen fouji afsar hain. Major Gogoi ney guzashta baras April mein aik Kasmiri naujawan ko apni jeep se bandh kar insani dhaal banaya tha. Is qabeeh feal ki aalami satah par muzammat ki gayi thi taham Fouj ney un ke is feal par kisi qisam ki tadeebi karwai nahi ki thi. Tadeebi action lainay ke bajaye Major Gogi ko fouji aizaz se nawaza tha. Fouji zaraye ney aaj bataya ke Mejor Gogoi ke khilaaf tadeebi karwai ke ahkaam jari kiye ja chukay hain.