Muradabad: Salman Khan ki film dabang se bollywood mein shohrat ki bulandiyoun ko chune wali mashur adakara Sonakshi sinha se Uttar pardesh ke Shehar Muradabad mein dhoka dahi muamlay mein pooch tach ke liye muqami police nay Mumbai ka rukh kiya. Sonakshi par ilzam hai ke inhen pichle saal 30 September ko Dehli mein munaqqid ek programme mein muzahira karne ke liye aana tha lekin woh is programme ke liye 37 laakh rupay ki fees lene ke bawajood nahi pohnchain jabkay unke anay ke liye saari tayyariyan bhi karli gayi theen, jiski wajah se kaafi kharcha bhi hochuka tha.
Police zaraye nay kaha ke adakara Sonakshi sinha ki Mumbai rahaish gaah par utar pardesh police nay dastak di hai. Sonakshi par 2018 mein mubayyana tour par dhoka dahi ke muamlay mein shaamil honay ki wajah se Muradabad ke Kathghar kotwali mein ek muqadma darj kiya gaya tha. uttar pardesh ke Muradabad zila ke Kathghar thaane, Shivpuri ke rehne walay pramod sharmaa nay dhoka dahi ka ilzaam lagaya hai jo ke India fashion and beauty award naam se events company chalatay hain.
Shikayat guzaar nay kaha ke Sonakshi nay is ke sath 37 laakh rupay ki dhoka dahi ki hai. muamlay ki kahin samaat nah honay ki wajah se shikayat guzaar nay 13 feb ko zeher khakar khudkushi karne ki koshish ki thi, jiske foran baad hi police Aala ohdedaron ke is muamlay mein jaanch ke hukum ke baad Sonakshi sinha sameit paanch deegar afraad par is muamlay mein Kathghar kotwali mein tazirat hind ki dafaa 420, 120 bi, 406, 34 mein maamla darj kiya gaya hai aur tabi se tehqiqaat shuru kar di gayi hain.
Mobayyana tor par mulzim ke zareya FIR ko high court mein challenge kiya gaya tha, jis ke bad adalat nay Sonakshi ko bari raahat dete hue unki giraftari par rok lagadi thi. is silsilay mein Mumbai mein Juhu police nay tasdeeq karte hue kaha ke uttar pradesh se Mumbai pohanchi Muradabad police team nay un se madad mangi thi. police bayan darj karne ke liye adakara ke ghar pohanchi thi lekin is waqt woh ghar par nahi theen is liye Muradabad police phir se Sonakshi ke ghar ka doura kar sakti hai. –YTN STAFF