Bhopal: Madhya pradesh ke zila Ashok nagar mein social media par qabil-e-aitraaz tabsarah karne ke silsilay mein 1 shakhs ke khilaaf qanooni karwai karte hue usay jail ki salakhon ke peechay pohancha diya gaya hai.
City kotwali police nay kaha ke 15 august ko raksha bandhan ke din Chanderi thaana ilaqa ke Dangasar gaon mein do mulzimaan nay teen noujawanon par chaaqo se hamla kar diya tha.
Hamlay mein Chanderi ke bashinday pramod rekawar ki jaye waqoo par hi mout ho gayi thi, jabkay Nandlal kohli aur sanju shadeed zakhmi hogaye the.
Waqiya ke baad halaat kasheeda honay par ilaqay mein Ashok nagar, gina, Shivpura¸ teen azlaa mein police force ko tainaat kiya gaya tha. is waqiya ke silsilay mein gina ke bashinday Ansar Mirza nay apne social media account se mutanazia tabsaray post kiye the, is par ashok nagar city kotwali police nay Ansar Mirza ke khilaaf muqadma darj karte hue usay girftar kar ke jail bheij diya.
Ashok nagar police superintendent Pankaj nay zila ke awam ko social media par mutanazia aur qabil-e-aitraaz post na karne ka mashwara diya aur aisay post karne par qanooni karwai kiye jane ka intibah bhi diya hai.
Ashok nagar additional police superintendent Sunil kumar nay kaha ke gina ke 1 shakhs nay Chanderi ke waqea ko firqa waranah shakal dainay ki koshish karte hue social media par post kiya tha. kotwali mein mulzim ke khilaaf maamla darj kar liya gaya. –YTN STAFF