New Delhi: Social Democratic Party of India ( SDPI ) ke qaumi naib sadar Advocate Sharifuddin Ahmed ne rawan saal Feb mein shumali mashriqi Delhi mein honay walay firqa waranah fasadaat ke barey mein Delhi aqliati commission ( DMC ) ki haqayiq report ki sifarshaat ka kher muqaddam kiya hai. Jin fasadaat ne mulk ki zameer ko hila kar rakh diya tha. Aqliati commission ki report se ye baat saaf tour par samnay aayi hai ke ye fasadaat achanak nahi hue they balkay ye fasadaat munazzam aur mansoobah band tareeqay se kiye gaye they.
Fasadaat mein muqami logoun ke sath badi tadaad mein baher ke loog bhi shaamil they. Is report mein 11 Masajid, 5 Madrasay, 1 Dargah aur 1 qabrustan ki dastaweez ki gayi hai jin par fasadaat ke douran hamla kiya gaya tha aur inhen nuqsaan pohanchaya gaya tha. Sharifuddin Ahmed ne mazeed kaha hai ke is Report mein Feb 2020 mein Delhi ke Assembly intikhabaat ke intikhabi muhim ke douran BJP rehnumao ki taqriroun, Tashadud ko bhadkanay mein dayen baazu ki intahaa pasand hindu taqatoun ke kirdaar ko tehraya gaya hai. Jinhon ne CAA mukhalif muzahireen ke khilaaf khullam khulla logoun ko uksaya tha. Jis ke baad RSS ke himayat yafta garohoon aur hamioun ke zariye Musalmanoon ka qatal kiya gaya aur un ke amlaak ko tabah kiya gaya tha.
Delhi Aqliati commission ki report mein Delhi police aur Hindotva qosorwaroun ke mabain gath jood ka inkishaaf huwa hai. Jinhoun ne shumal mashriqi Delhi mein be gunah Musalmanoon ki jaanun aur amlaak ko tabah karne ke liye haath milaya tha. SDPI ne markazi aur reyasti hukoomatoun aur khaas tor par adliya par zor diya hai ke wo mutasireen ko insaaf faraham karen aur mustaqbil mein is terhan ki tabahi ki rokk thaam ke liye Delhi aqliati commission ki report par amal kere.