Gaza Patti: Shohar aur Biwi ka rishta aisa huta hai jo dukh dard mein ek dosray ka sath dete hain aur agar halaat buray hojaye to apni jaan de kar dosray ki jaan ki hifazat karte hain lekin ek waqea ne is behtareen rishte ko sharmsaar kar diya hai jahan shohar ne mehez 5 Dollars ke liye apni Biwi ka qatal kardiya.
Gaza Patti mein Palasteeni khatoon ke qatal ke waqea sansani phela di hai. Shohar ne mehez 5 Dollar ki khatir Biwi ka gala ghoont diya tha. Palestineon ne gharelo tashadud ke is qisam ke waqeat se khawateen ko bachanay ke liye qanoon saazi ka mutalba kiya hai. Tafseelaat ke mutabiq maqtool khatoon Safa ke chacha Jalal Shikshak ne kaha hai ke Safa ke shohar ne waardaat ki raat 2 martaba Safa ko qatal karne ki koshish ki thi. Safa apne walidain ke ghar aagai thi jahan se is ka shohar usay apne ghar le kar chala gaya tha. Ghar waloun ne Gaza Patti mein awaami qanooni karwai ke ohdedaroun ke sath mulaqaat kar ke inhen waardaat ki tafseelaat se aagah kiya.
Ye bhi wazeh kiya ke khawind ne apni biwi Safa ke qatal ka aitraaf karliya hai. Shohar ne ohdedaroun ke samnay bayan dete huve kaha, Kahani is waqt shuru huvi jab Safa mere hamrah apne Maa Baap ke ghar se aayi thi. Is raat hum dono mein jhagda hogaya tha. Is se 5 Dollar maang raha tha jo is ne apni walida ko day diye they.
Maqtolah ke chacha ne kaha hai ke jhagda shiddat ikhtiyar kar gaya isi douran khawind ne pehli martaba Biwi ka gala ghoontnay ki koshish ki aur phir ye samajh kar chhodh diya ke wo aakhri sansen le chuki hai. Maqtolah ke chacha ne kaha ke kuch der baad khawind phir Biwi ke paas aaya. Jab is ne ye dekha ke wo abhi tak saans le rahi hai aur zindah hai to is ne ziyada qowat ke sath biwi ka gala ghontaa aur phir subah 7 bajey tak laash ke paas betha raha.
Yaad rahay ke Safa 3 bachoun ki Maa hai. Miyan Biwi mein gharelo ikhtilafat aeye din hotay rehtay they. Social Media sarfeen ne Safa ke qatal ki tafseelaat shaya kee. Beshter ne is ki muzammat ki aur mutalba kiya ke khawind ko is gehnaone jurm ki ibrat naak saza di jani zurori hai. Is se qabal Palestine mein Asra nami ladki ke waqea ne pooray muashray ko hila kar rakh diya tha jo gharelo tashadud se dochar ho kar August 2019 ko intqaal kar gayi thi. –YTN STAFF