London: Pakistani Cricket Team ke All Rounder Shoaib Malik aur un ki Hindustani ahliya Sania Mirza ke hamrah Team ke saathi khiladion ke sath Hindostan ke khilaaf World Cup ke ahem muqaabla se qabal raat aik hotel mein huqqa peenay aur mouj masti karne ka Video Social Media par taizi ke sath Viral huwa hai.
Pakistani Cricket shaiqeen ke bamoujib is video mein team ke Opener Imam Ul Haq , All Rounder Imad Wasim aur Fast Bowler Wahab Riaz bhi dekhe jasaktay hain jo kay Manchester ke Wansula Road ke aik Hotel mein subah 2 bujey huqqa peetay huwe dekhe gaye hain. Is Video ke Viral honay ke baad Pakistani Cricket shaiqeen ney apni team ke khiladion par shadeed tanqeed aur barhami ka izhaar kya kyunkay dosray din Hindostan ke sath team ka aik ahem tareen muqaabla tha aur Pakistani team ney World Cup mein kabhi bhi Hindostan ko shikast nahi di aur is ahem muqaabla se Pakistani khiladion ki mouj masti par unhon ney shadeed barhami ka izhaar kya.
Is video ke khilaaf Hidrabadi Tennis Star Sania Mirza ney shadeed barhami ka izhaar karte huwe twitte kya ke jis kisi ney bhi is video ki filmbandi ki hai woh yaqeenan qabil muzammat hai kyunkay hamari ijazat ke baghair hamari niji zindagi aur mamlaat ko Social Media par shaya kya gaya halaank hamaray sath masoom bacha bhi tha. Sania Mirza ney apne twittemein istafsaar bhi kya ke muqaabla mein shirkat se qabal kya raat ka khana bhi khaya nahi jana chahiye? unhon ney video bananay walay ko ahmaq qarar dainay ke ilawa aindah behtar kaam karne ka mahswara bhi diya. Yaad rahay Hindostan ke khilaaf shikast ke baad Pakistani shaiqeen aur sabiq khiladi Shadeed barham hain aur khiladion par tanqeed kar rahay hain.