Hyderabad : Shehar ki sadakhoun par gadhay bharnay mein takheer se pareshan, aur un gadhoun ki Wajh se honay walay hadsaat se fikar mand congress kaarkunuon ne Chaharshambe ko wazeer-e-aala KCR aur TRS ke car-guzaar sadar KTR ki tasweeron se ghadhoun ko bharnay ka anokha ehtijaj kiya.
Congress karkunaan, TPCC mehakma aqliat ke chairman Abdullah Sohail ki sarbarahi mein mukhtalif ilaqoun ka doura kiya aur wazeer-e-aala KCR aur un-ke Farzand KTR ki tasaveer phenk diye.
Hyderabad aur Secunderabad, mein sadakhoun ki qabil-e-reham haalat ke liye KCR aur KTR ko zimme-daar qarar dete hue Sohail ne kaha ke ”KCR ke paas sadakhoun ki kharab haalat ko janchne ke liye, shehar ke kisi bhi ilaqay ka doura karne ka waqt nahi hai, jabkay KTR deegar siyasi sargar miyoun mein masroof hain.
Unhon ne mazeed kaha ke TRS ke GHMC par control haasil karne ke baad dono laa-pata ho gay they. media numaindon se baat karte hue Abdullah Sohail ne kaha ke shehar mein kharab sadakhein, qaatil-e-sadakhoun mein tabdeel ho gayi hain, kyunkay GHMC ke intikhabaat mein TRS ke jeetnay ke baad se pichlle saadhay teen saloun mein 8,783 sadakh hadsaat mein 1,155 afraad halaak hogay hain.
Rawan saal 30 June tak 1,258 hadsaat mein se 446 muqadmaat two wheelers se mutaliq the aur un hadsaat mein 129 afraad halaak hue they.
Congress rehnuma ne ilzaam lagaya ke TRS hukoomat ne dono shehron ko nazar andaaz kiya hai aur wazeer-e-aala ne Hyderabad ke mamlaat par ek jaiza ijlaas bhi munaqqid nahi kiya hai. mazkoorah ehtijaj mein TPCC ke tarjuman Syed Nizam Uddin, city congress aqliati mehakma ke chairman sameer walii ullah , Sajid shareef aur deegar ne hissa liya. –YTN STAFF