Chennai : Chennai mein police ne 1 shakhs ko giraftar karliya jis ne saat ladkiyoun se shadi ki hai aur mazid 6 ladkiyoun ke sath jinsi taluqaat banaye they lekin is shatir shakhs ne kisi doosri khatoon ko apni kisi doosri shadi ki bhanak tak honay naahi di hai.
42 sala Rajesh Prithvi ne Chennai mein ek tele marketing company qaim ki aur is mein kaam karne ke liye is ne 22 ladkiyoun ka taqarur kiya taham is ne company ki saat ladkiyoun se shadi ki.
Dilchasp baat yeh hai ke un ladkiyoun mein se kisi ek ko bhi doosri ladkiyoun se hui shadi ke baray mein ilm nahi tha. sath hi is ne mazeed 6 ladkiyoun ke sath jinsi taluqaat bhi banaye. bal-aakhir police ne isko giraftar karliya. is ne 10th jamaat tak taleem haasil ki thi.
Is ne police ohdedar ke libaas mein tasweer bhi khinchwayi aur yeh batane ki koshish ki ke Encounter ke maahir honay aur do Encounter karne par isko moattal kardiya gaya. Is ne yeh company 2017 mein qaim ki thi aur tab hi se woh ladkiyoun ka taqrarur karte hue yeh kaam kar raha tha. isi douran ek ladki ke aghwa ki is ke walidain ki janib se ki gayi shikayat ki bunyaad par police ne jab is se pooch gach ki to yeh sara maamla samnay aaya.
Mulzim ki shanakht Tripura zila ke Rajesh Prithvi ke naam se hui hai, jiske khilaaf Andhra Pradesh ke maqam mein azdawaji taluqaat ke kam az kam 6 muqadmaat zair-e-iltiwa hain.
Usay ek baar Tirupati mein giraftar kiya gaya tha. zamanat par bahar anay ke baad woh mukhtalif maqamat par chala gaya. is ne mubayyana tor par logoun se unkay bachon ko medical nishistain dilanay ka waday par 30 laakh rupay bhi liye. Ek khatoon ko aghwa karkay is se shadi karne ki koshish ke baad bal akhir woh police girift mein aaya. –YTN STAFF