Friday, March 29, 2024
HomeJurmShastripuram mein qatal ki waardaat

Shastripuram mein qatal ki waardaat

Hyderabad. Cyberabad Commissionerate mein Mailardeopally Police Station ke hudood mein Shastripuram Mainn Road par teen naamaaloom afraad ney aik workshop mein daakhil hokar hammer se hamla karkay 50 sala Amjad naami shakhs ka qatal kardiya. Sahiti Colony, Nice Hotel ke saakin Amjad plywood karkhana mein kaam kar rahay thay. Woh apne kaam mein masroof thay ke teen naamaaloom hamla aawar wahan pahonche aur un par hamla karte hue un ke sar par aik wazni hammer se waar kardiya jis ke baayes un ke sar par shadeed chout aayi aur woh barsar e mauqa hi halaak hogaye. Qatal ki ittila milnay par Inspector of Police Mailardeopally Mr. A Sataya wahan pahonch gaye aur mauqa waardaat ka mushahida kya aur ayini shahideen se ibtidayi maloomat haasil kee. Clues Team ko talabb karte hue muqaam e waardaat se shawahid ikhatta ki gayeen. Panchnama karne ke baad laash ko postmortem ke liye Osmania General Hospital muntaqil kardiya gaya. Police ney kaha ke hanooz hamla awaron ki shanakht nahi hosaki aur na hi qatal ki wajohaat ka pata chal paaya hai. Mr. Sataya ney bataya ke iss ilaqa ke CC Tv footage ke zareya hamla aawron ki shanakht ki jarahi hai.