Hyderabad: BJP ke firqa parast leaders ke ista-aal angaiz bayanaat ne Hindustan ke dar-ul-hukoomat Delhi ko aag ke hawala kardiya, Kayi dinoun tak shumal mashriqi Delhi ke ilaqoun ko shar pasandoun ne nishana banaya aur musalmanoun ke makanaat, Dukanat, Cars aur deegar amlaak ko jala kar khakstar kardiya. Delhi fasadaat mein kayi nojawan maaray gaye aur kayi gharoun mein maatam barpaa huva. Delhi fasadaat mein goli lagnay se 93 afraad zakhmi huve hain jabkay 13 afraad goli lagnay ki wajah se halaak huve hain. Police ne hathyaar ke mutaliq jo qanoon mojood hai is ke tehat 45 muqadmaat darj kiye hain jis se andaza hota ke Delhi fasadaat mein kis qader bandoqoun ka istemaal huva hai aur awam par golian barsayi gayeen hain.
Social Media par golian chalaye jane ke kayi ek Videos Viral huve hain aur Police ki janib se darj kardah muqadmaat se ye wazeh hojata hai ke golian chalanay walay aur hathyaar istemaal karne waloun ke chehray be naqaab hona hanoz baqi hai. Ab ye sawal bhi ahmiyat ikhtiyar kar gaya hai ke bandoqoun ke zareya golian chalanay walay muqami loog they ya phir ye sharpasand baher se anay walay ghunda anasir they. Lekin un tamam waqeat mein ek nojawan Shahrukh ki giraftar amal mein aayi hai jis ka goli chalanay ka Video Viral huva jis ki bunyad par Police ne karwai karte huve usay giraftar kiya hai.
Delhi fasadaat ke douran police par firing karne walay nojawan Shahrukh ko Delhi ki ek muqami adalat ne 4 dinoun ke liye Police tehweel mein day diya hai. Shumal mashriqi Delhi ke Karwal Nagar ka rehne wala Shahrukh ko Delhi Crime Branch ne Uttar Pradesh ke Bareli se giraftar kiya. Feb 24 ko huve ehtijaj ke douran, Shahrukh ek surkh rang ki Tshirt mein malbos tha aur is ki Jafraabad mein ek Police jawan par Revolver ke zareya firing karne wali video aur tasweer, Social Media aur TV News channels par Viral huvi thi. Is ne firing ki thi aur is ki giraftari ke baad Police ne usay adalat mein pesh kiya jahan Judge ne usay Police tehweel mein lainay ki ijazat di. Ab police 4 din tak pooch teach kere gi.
Ibtidayi tehqiqaat ke baad jo tafseelaat manzar aam par aayi hain is mein kaha gaya hai ke Shahrukh ek muqami nojawan hai aur is ki yahan ek Factory hai aur is ne 2 saal qabal hi bandooq haasil ki thi. Social Media par jo Video Viral huva hai is ka tajzia kiya jaye to andaza hota hai ke Shahrukh ke bandooq se 2 martabah golian chalne ki aawazian aati hain. Shahrukh ne Delhi Police ke jawan Deepak par bandooq taan di thi.
Police ke mutabiq Shahrukh ne 2 saal qabal hi bandooq haasil ki thi lekin wo bandooq abhi bar aamad nahi huvi hai. Tehqeeq ka mauzo ye bhi ke is nojawan ki bandooq se kis kis ko nuqsaan huva hai. Bandooq ke mutaliq tehqiqaat jari hain aur kaha ja raha hai ke ye Pistol Mongir ka bandooq hai. Mazkoorah bandooq shareh factory mein kaam karne walay apne saathi se haasil kiya tha kyunkay wo saathi jo Shahrukh ke Factory mein kaam karta tha is ka talluq Mongir se hai.
Ibtidayi tehqiqaat mein ye inkishaaf bhi huva ke Shahrukh ka maazi mein koi mujremana Record nahi hai aur na hi kisi giroh is ka talluq hai taham is ke waalid ka jali currency aur Narkotek yak muqadma hai. Shahrukh ka kis giroh se talluq hai is ke mutaliq tehqiqaat jari hain. Shahrukh jo ke ek Factory ka maalik hai aur usay Modeling ka bhi shoq hai. Alawa azeen tiktok Videos bhi mojood hain. Sath mein ye bhi kaha gaya hai ke Shahrukh se jab Police ne Firing ki wajah daryaft ki to is ne kaha ke jab fasadaat ho rahay they to wo aapay se baher hogaya aur is ne goli chalanay shuru ki.
Ye hi wo sawal hai jis ne kayi aur sawalaat ko aisa peda kardiya hai jisay koi zameen se maray mardoun ko ek zabardast koshish ke sath baher nikaal raha ho. Shahrukh ko taish kyun aaya kiya is ne aqliat aur khaas kar musalmanoun par hotay huve zulm ko raast apni aankhoun se dekh liya tha ye phir wo kisi aisi harkat ka chasham deed gawah hai jis mein siyasi leaders, Dehli Police aur sharpasandoun mulawwis hain. –YTN STAFF