New Delhi: Shehriat tarmeemi qanoon, NRC, NPR ke khilaaf Shaheen Bagh ki khatoon muzahireen ne ek allag andaaz mein muzahira kiya. Aaj Shaheen Bagh mein subah se hi kaafi khamoshi rahi aur is ki wajah ye hai ke khawateen ne aaj khamosh muzahira karne ka faisla kiya. Shaheen Bagh mein baithi khawateen ne faisla kiya hai ke aaj stage se koi taqreer nahi hogi aur muzahiray mein poori terhan se khamoshi rahay gi. Qabil zikar hai ke Shaheen Bagh mein baithi khawateen ke darmain din bhar kuch na kuch taqreer zaroor hoti rehti hai aur shehriat tarmeemi qanoon aur NRC ke talluq se logoun mein baedaari peda ki jati rahi hai. Lekin aaj aisa kuch bhi dekhnay ko nahi mila.
Shaheen Bagh mein aaj jab kuch media numainday puhanche to unhein mahol bilkul badla badla huva nazar aaya. Sabhi khamosh then aur jab un se sawal kiya gaya to unhoun ne isharay mein kuch bhi kehnay se mana kar diya. Khamosh muzahira karne wali khawateen ne ek poster ki taraf ishara kiya jis mein likha huva tha ke’ Aaj khamosh muzahira hai’. Ye sawal karne par ke aisa kyun hai? Qareeb mein placard bana rahay ladke ne likh kar bataya ke ”Intekhabi nataij anay aur Jamia mein huve talba police tassadum ki wajah se ye khamosh muzahira hai.
Delhi Assembly intikhab par Shaheen Bagh ki khatoon muzahireen se is silsilay mein jab sawal kiya gaya to unhoun ne likh kar bataya ke yahan ( Shaheen Bagh ) se hum kisi siyasi party ki himayat nahi karte aur yahan se kisi ki nah hum burayee karen ge aur nah hi bhalai. Is liye hum sabhi loog khamosh muzahira kar rahay hain taakay koi ghalat pegham yahan se nah chala jaye. Ye sawal kiye jane par ke ye khamosh muzahira kab tak chalay ga, Tehreeri shakal mein bataya gaya ke ye khamosh muzahira raat tak jari rahega taakay hum se koi intikhab ke baarey mein sawal nah kare. –YTN STAFF