Trinidad: Shah Rukh Khan ki team Trinbago Knight Riders ke Captain Kieron Pollard ki umdah Bowling aur is ke baad Lendl Simmons aur Darren Bravo ke mabain Record shiraakat ki badolat Trinbago Knight Riders ( TRK ) ney St. Lucia Zouks ( SLZ ) ko 8 wicketon se shikast day kar chothi martaba Caribbean Premier League ka aizaz haasil karliya hai. TRK league ki tareekh ki pehli team bani jis ney ek hi season mein na qabil taskheer rehtay hue khitaab bhi haasil kiya hai. Rawan season mein team ney final sameit 12 match jeetay hain.
Franchise ke maalik Shah Rukh Khan bhi Rider team ki is jeet se bohat khush hain. Shah Rukh Khan neh Twit kiya aur Riders team ko kamyabi par mubarakbaad pesh ki. Shah Rukh neh likha ke umdah khail dekhaya. Aap neh hamein fakhr karne ka mauqa diya. Logon ke baghair bhi party karne ka mauqa diya. Tamam team arkaan ko mubarakbaad. Qabal azeen final mein TRK neh toss jeet kar pehlay bowling karne ka faisla kiya. St. Lucia neh pehlay batting karte hue 19.1 overs mein 154 runs banaye. Team ke liye Andre Fletcher neh 39, Ruston Chase neh 22 runs banaye. Team ke kisi aur khiladi ney badi inning nahi kheli. Pollard ney 30 runs par sab se ziyada 4 wicket haasil kee, Jabkay Fawad Ahmed aur Ali Khan ney fi kis 2 khiladion ko out kiya. TKR ney 18.1 overs mein 2 wicketon par 157 runs banakar match jeet liya.
Is se pehlay TRK ney 155 runs ke taqub mein kharab aaghaz kiya tha. Un ki 2 wickten 19 runs par ger gayen. Tion Webster 5 Tim Seifert 4 runs bana kar Out hugaye. Is ke baad batting ke liye aaye Lendl Simmons aur Darren Bravo ney 138 runs ki shiraakat mein team ko yeh aizaz bakhsha. Simmons ney 49 gaindon par 84 runs banaye. Is Inning mein unhoun ney 8 chokay aur 4 chhakay lagaye. Un ke ilawa Darren Bravo ney bhi 47 gaindon par 58 runs banaye. Simmons aur Bravo ke mabain teesri wicket ke liye 138 runs ki shiraakat qaim hui. Simmons match ke behtareen khiladi qarar paye.