New Delhi: Congress ne sabiq markazi wazeer Jyotiraditya Scindia ko Party se bar tarf kar diya hai. Congress ki sadar Sonia Gandhi ne Scindia ko un ki Party mukhalif sar garmioun ke sabab fori tor par Party se bar tarf kiye janay ko manzoori di. Party ke General Secretary ke S Venugopal ne bayan jari kar ke Scindia ke Party se bar tarf kiye janay ki ittila di.
Is se qabal Scindia ne Party ki ibtidayi rukniyat se istifa dete huve Sonia Gandhi ko khat likha tha. Scindia ne mangal ki subah pehlay markazi wazeer e dakhla Amit Shah se mulaqaat ki aur is ke baad dono wazeer e azam Narendra Modi se milnay un ki rahaish gaah gaye. Taqreeban ek ghantay tak jari rahi mulaqaat ke baad Scindia aur Aamit Shah ek sath baher niklay. Is ke kuch der baad Scindia ne Twitter par apne isteefay ka elaan kar diya.
Scindia ne Sonia Gandhi ko beje gaye khat mein likha mein guzashta 18 barsoun se Party ke ibtidayi rukan tha aur ab waqt aagaya hai ke mein Party se allag apni raah loun. Mein Party ki ibtidayi rukniat se aur Indian National Congress se istifa day raha hon. Unhoun ne ye bhi kaha ke un ka maqsad aur hadaf mulk aur apni riyasat ke logoun ki khidmat karna hai. Inhen mehsoos ho raha hai ke wo Congress ke andar wo ye kaam agaye nahi badha payen ge.