Hyderabad : Riyasat Andhra pradesh ke zila kurnool may waqay AP model Residential school may khoufnaak mahol paaya jata hai kyunkay school may Bhoot honay ki afwaah jungle ki aag ki tarhan phail gayi jis ke nateeja may talibat hostel chodh kar apne gharoun ko wapas horahee hain.
Bhoot ki Khabar hafte ko phailne se shuru hui aur dekhte hi dekhte androon 24 ghantay kayi pareshan Ladkiyoun nay ek ke baad deegray hostel chodh diya. un talibat nay apne walidain ko talabb karte hue unse darkhwast ki ke unko ghar wapas le jayen. is high school may 75 talbat hain.
Hostel ki imarat pahadhi ilaqa may hai. jummay ko 11th jamaat ki Taliba nay nisf shab ko Daraoni aur ronay ki aawazian sunen. hafta ki subah is nay –apne walidain ko talabb kiya aur un ke sath apne gaon wapas chali gayi. is Taliba nay apni saheliyo se is waqea ka tazkara kiya aur dekhte hi dekhte yeh khabar hostel may rehne wali tamam talbat tak pohanch gayi jis ke sath hi kayi talbat nay apne samaan bandha aur hostel ko chodh diya.
Itwar ko hostel ke ahata may walidain ki badi tadaad dekhi gayi jo apni betiyoun ko wapas le jane ke liye aaye they. doosri janib school hukkaam nay talibat ke khauf ko khatam karne ki koshish ki aur unke walidain ko Ladkiyoun ki salamti ki yaqeen dehani karwai taham walidain apni betiyoun ko ghar lekar chalay gaye. school ke Principal nay kaha ke ek Taliba ki janib se yeh afwaah phailai gayi hai.
School hukkaam ki janib se un talbat ko bhoot ke nah honay ke talluq se qaail karwanay ki koshish ki gayi taham talibat apne aabadi maqamat ko wapas chali gayeen. isi douran jina ke secretary general S suresh nay kaha ke talibat ko is tarhan ki tawaham parasti ke talluq se bedar karne ki zaroorat hai. –YTN STAFF