Podili. Zila Prakasam ke Podili mandal mein mangal ki subah aik bada haadsa tal gaya, 80 bachon ko le jaaney wali Bus ulat gayi taham sirf chaar bachay hi zakhmi huwe, muqami logon ney bachon ko Bus se nikaal liya. Gitanjali English Medium School ki yeh Bus Maarripodi mandal ke mauza Pannur se bachon ko le kar Podili mandal ke Viswanthapuram le jarahi thi. Bus mein route ke villages se talluq rakhnay walay 80 bachay pahelay hi se sawaar ho chukay thae, Katurivari Palem mauza ke qareeb aik culvert par Driver ney Bus par qaboo khodia aur Bus sadak ke kinare ludakh kar ulat gayi. Qareebi khaiton mein kaam karne walay muqami log wahan pahonch gaye aur bachon ko fauri Bus se nikaal liya. Chaar bachay is haadesa mein zakhmi hogaye aur unhen Ambulance mein Podili Hospoital muntaqil kiya gaya. Talba ke Parents jo muqam e haadisa pahonch gaye thae School intezamia par ilzaam aayed kiya ke 120 bachon ke liye sirf aik Bus istemaal ki jarahi hai. Unhon ney yeh bhi ilzaam aayed kiya ke driver Subaiah nihayat hi la parwah hai aur woh musalsal gadi chillatay huwe Mobile Phone par baatein karta rehta hai. Principal Bhagya Laxmi ney haadisa aur walidain ke ilzamaat par tabsarah karne se inkaar kardiya.