Riyadh: Saudi Royal Guards mein pehli Saudi khatoon ki wardi mein douran duty tasweer social media par Viral hai. Website ke mutabiq shehzada Sattam bin Khaled Al Saud ne twitter account par Royal Guards ki wardi mein pehli Saudi khatoon ki tasweer aisi Emogies ke sath shaya ki jin se zahir ho raha hai ke Saudi Arab khawateen ke kirdaar ko qadar-o-manzillat ki nigah se daikhta hai aur inhen watan aziz ki taamer o taraqqi mein apna hissa ada karne ka mauqa faraham kar raha hai.
Social Media par Viral tasweer mein Saudi khatoon Viral guard ki wardi mein khidmaat de rahi hain. Is ke qareeb Royal Guard ka ek aur ohdedar bhi tainaat hai. Dono hifazati mask pehnay huve hain. Maroof qalamkar khatoon Halima Al Mazfar ne twitter par Royal commission mein Saudi khatoon ki tasweer shaya karte huve lekha ke watan Aziz ki khawateen par fakhr karti hon. Tasweer dekh kar dil baagh baagh hogaya.
Omar Al-Nashwan nami sarif ney Royal commission mein khatoon ki tasweer par tabsarah karte hue kaha ke hamari betiyan har maidan mein baais naz hain. Mehakma shumariyat ney Saudi khatoon kamyabi ke safar ki saathi ke unwan se report mein kaha ke Saudi vision 2030 ney khawateen ki hesiyat mazboot bananay aur inhen mulki o bain ul aqwami sathoun par apna kirdaar ada karne ke mazeed mawaqay muhayya karne ki raah hamwar ki hai.
Social Media par beshtar Saudi sarfeen ney Royal commission mein khatoon ki shamoliat par pasandeedgi ka izhaar kiya aur is iqdaam ko qabil tareef qarar diya. Baaz logoun ney is par herat ka bhi izhaar kiya hai.