Riyadh: Saudi Arab ke shumal maghribi ilaqay Tayma mein Hadaj nami kunwan qadeem zamane se jazeera numay Arab ka mashhoor tareen qudrati kunwan maana jata hai. Ye kunwan zamane ki tabdeelion ka muqaabla karta raha aur aaj kal bhi Tayma shehar anay walay is kunvey ka deedar kiye bana nahi jatay.
Ye kunwan 1600 qabal maseeh pehlay taamer kiya gaya tha is ke baaray mein be shumaar qissay aur kahaniyan awam mein mashoor hain. Saudi khabar-rasan idaray SPA ke mutabiq is kunvey ka dhana 62 meter hai. Ye gayarah se baara meter gehra hai. Is ki taamer mein chamkile pathar istemaal kiye gaye hain. Is ke charon taraf khajoor ke darakht lagey hue hain. Muqami bashinday maazi mein apni khaiti baadi ki aab paashi isi kunvey ke pani se kiya karte thay. Is se 100 oont beak waqt pani piya karte thay. Is kunvey ka pani 31 nehron ke zariye khaiton mein le jaya jata tha.
Hadaj kunwan mukhtalif auqaat mein tabah kun waqeat se dochar huwa. Kayi baar is ki baqa tak ko khatrah la-haq hogaya taham is ke nuqoosh kisi bhi zamane mein nahi mite. Usay chaarsou baras qabal az sar-e-noa khudayi karkay mo-asar banaya gaya. Muqami bashinday 1373 h yani 68 saal qabal tak kunvey se pani nikaal kar khaiton ki aab paashi karte rahay hain. Shah Saud Bin Abdulaziz ny 68 baras qabal 1373 h mein Tayma ke doray ke mauqa par kunwan dekh kar is par chaar mashinen nasb karne ka hukum jari kiya tha. Tab se ab taq ye kunwan barabar pani day raha hai aur is ki badolat khittay ka zarayi ilaqa achi faslein peda kar raha hai.
Hadaj kunwan Saudi Arab ke nihayat ahem tareekhi aur sayahati maqamat mein se ek hai. Mumlikat ke tamam ilaqon hi nahi balkay bairooni duniya ke sayah bhi ye kunwan dekhnay ke liye Tayma pahunchaty hain. Governor Tabuk shehzada Fahd Bin Sultan ny haal hi mein Hadaj kunvey ki murammat aur is ki tazaeen-o-Araish karwai hai jis ki badolat ye Tayma ka ahem tareen qabil deed sayahati maqam ban gaya hai. Kunvey ke atraaf badh lagadi gayi hai taakay koi is mein kaath kabaar nah daaley aur is ki ifadiyat kam karne wala koi kaam nah kere.