Riyadh: Coronavirus ke phelao ko roknay ke liye Saudi Arab ki janib se aayed ki jaaney wali pabandi ke baais mumlikat mein reh jaaney walay Umrah zaireen ki wapsi ka amal shuru hogaya hai. Jeddah ke King AbdulAziz International Airport par tainaat mehakma Passport ke hukkaam ney safri pabandioun ke baais ruk jaaney walay Umrah zaireen ki wapsi ke liye Immigration ki karwai ki hai.
Saudi khabar-rasan idaray SPA ke mutabiq Passport hukkaam ney un Umrah zaireen ki watan wapsi ke liye Immigration ki karwai nemtayi hai jin ke Umrah Visas khatam hogaye they. Ye karwai wizarat Hajj o Umrah ke Online Record ko samnay rakh kar ki gayi. Yaad rahay ke Saudi qanoon ke mutabiq Umrah Visa ki meyaad se zayed qiyam par jurmane aur sazayen muqarrar hain jabkay aisay afraad ko Blacklist bhi kardiya jata hai. Shahi Faramen jari karkay un Umrah zaireen jo ruk gaye they jurmane aur qaid ki sazaoun se istashna diya gaya. Umrah zaireen ki watan wapsi ke tamam intizamaa nigaran Committee ki sarparasti mein anjaam diye gaye.
Mehakma Passport ney apne bayan mein kaha hai ke wizarat Hajj o Umrah, Wizarat sahet, Shehri hawabazi aur King AbdulAziz International Airport ke hukkaam ke taawun se watan wapas jaaney walay Umrah zaireen ka Airport par khair muqaddam kiya gaya jabkay naye Coronavirus ke phelao ko roknay wali ahteyati tadabeer par bhi amal kiya gaya. –YTN STAFF